東京奧運|開電視兩代奧運金牌訪問高質 ViuTV陳安立直播失手馬啓仁執生反應快?

香港政府購入今屆東京奧運播映權,並由無綫電視TVB、ViuTV、香港開電視、Now TV以及有線電視5間電視台分別直播賽事,不過就現場實地採訪以及賽事評述方面,TVB、ViuTV及香港開電視就最多人討論。

網民除咗大讚香港開電視77台早前邀請到兩代奧運金牌得主李麗珊與張家朗進行對話訪問夠晒心思,對於主持旁述質素亦較滿意,例如喺香港游泳代表何詩蓓200米自由式賽事中,就請到何詩蓓好友亦同樣係游泳運動員嘅江忞懿任旁述,就連藝人伍詠薇都喺Facebook公開大讚香港開電視台前幕後團隊喺準備資料方面做得好好,有網民亦留言表示同意:「我都覺得開電視佢哋做得好好呀」、「徐家樂以前響atv做奧運主持時已好出色,資料蒐集做得好」。不過,亦有網民喺香港開電視Facebook留言指:「睇直播,真係唔想聽主持傾計多過講波,真係討厭」、「點解香港開電視中文台淨係得英文旁述」。

而TVB最令人記得就係採訪隊陳約臨訪問花劍金牌得主張家朗,即場「表白」以及打斷受訪者講嘢行為遭網民評擊唔專業,就連台灣網民見到之後亦喺網絡熱議。另外,網民亦指方力申觀戰花劍決賽時喺自己IG直播呢個行為有侵權之嫌,事後方力申刪去直播片。不過,亦有網民認為方力申喺香港游泳代表何詩蓓奪得女子200米自由泳銀牌後,向對方提問技術性問題,表現非常出色。

至於ViuTV主持亦有失手之事,喺早前直播三人籃球決賽時,陳安立唔記得將手機調至靜音,令直播熱身情況時突現出現電話鈴聲,不過馬啓仁(Keyman)與陳嘉倩即時為佢解圍,馬啓仁更笑指:「做咩?呢個鈴聲係較定鬧鐘睇呢場波?」執生反應非常快。

香港開電視
香港開電視
TVB
TVB
ViuTV
ViuTV

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!