林家謙開齋封《叱咤》歌王 So Ching歸隊穩軍心 姜濤脹爆搶風頭

唱作歌王林家謙在《叱咤》頒獎禮首奪男歌手金獎，橫掃多個獎項的他成為大贏家，但「歌王」風頭被正式歸隊的COLLAR成員So Ching以及強勢復工的人氣王姜濤蓋過！

《2022年度叱咤樂壇流行榜頒獎典禮》昨晚隆重舉行，過百歌手到場，唯獨環球唱片沒有歌手出席。全晚共頒發49個獎項，一如本報率先爆，唱作歌手林家謙首奪男歌手金獎，加上幕後獎項，他成為全晚大贏家，而鄭欣宜冧莊女歌手金獎。不過，全晚焦點落在腳傷初愈的姜濤和MIRROR演唱會意外後首度正式露面的女團COLLAR成員So Ching身上。

COLLAR相隔5個月終於合體現身，全場歡呼聲不斷，她們穿上白色露腰隊服，面露笑容的So Ching淡定站在芯駖及Winka中間，兩人緊緊拖實她，而大會安排COLLAR跳唱《Call My Name》為頒獎禮響頭炮，企正中的So Ching雖然停工數月，但狀態回勇，舞姿沒有生疏。COLLAR奪得生力軍組合金獎，隊長Gao代表發言，期間哽咽致謝，而芯駖更爆喊，反觀So Ching表現冷靜，演出時兩度獨唱，全場尖叫聲不斷，台下粉絲高舉燈牌支持，而唱完後Day擺甫士，但站不穩失重心，似是身體不適，Ivy即扶她落台。

謝安琪父親喪失記憶力

至於MIRROR隊長Lokman因確診缺席，同樣中招的Tiger和Alton趕及康復現身，休養了兩個月的姜濤毋須借助拐杖，步履輕盈，但就明顯增磅。他落樓梯時，Stanley和Anson Lo想攙扶他，但遭他婉拒，而他憑《鏡中鏡》奪得叱咤十大第4位，他說：「我都想豪少少畀下一位歌手，因為我想講嘅嘢都喺首歌入面。」演唱時他跪地而唱，可能是腳患初愈動作不宜太激烈，他未有跳唱，但就興奮得跳落台周圍走，令一班「姜糖」嗌到拆天。

首奪男金的林家謙憑《邊一個發明了ENCORE》奪得「至尊歌曲大獎」，之後再奪「至尊唱片大獎」，同時冧莊唱作人金獎，他演唱得獎歌曲時感性表示：「唔係所有嘢都可以Encore，隨時會失去，但人生有少少缺陷先係完整，好的壞的都要好好記住。」

謝安琪憑《憶年》獲叱咤十大第5位，台上哽咽自爆90歲爸爸不適入院：「佢開始記憶力衰退……想將呢首歌、記憶力送畀佢，同埋佢唔好唔記得咗我。」由於聲帶發炎，她未有演唱得獎歌。她在後台受訪再談到爸爸，眼濕濕表示：「佢曾『失蹤』幾小時，搵番後佢冇晒記憶力，應該係衰退同老人病，好擔心，打畀佢又唔明佢講乜。佢已經出咗院，睇吓點照顧佢，咁走失好危險，或者減少工作陪佢。」