楊千嬅50歲生日分享低潮期經歷曾刻意扮開心：見到CD碎到一地感心痛

楊千嬅近年主力內地市場，不過佢就選擇於50歲生日正日（2月3日）當天在香港「東蒲」與香港歌迷會度過。楊千嬅事前用咗兩星期籌備《MEET YOU AT THE HALFWAY MINI CONCERT 生日限定》大派對，參與人數近千人；楊千嬅於生日會上獻唱《火鳥》、《我係我》、《直覺》、《孔雀》、《偷生》等平日較少唱嘅歌，又與歌迷分享呢幾年嘅經歷及心路歷程，期間忍唔住落淚，唔少粉絲都感動得跟住楊千嬅落淚。

楊千嬅於會場率先表示一早決定要與香港歌迷會度過50歲生日：「我係香港出生長大，我一早決定50歲一定要係呢度同家人及朋友過，好多謝你哋陪我過呢個生日，我真係冇諗過，自己唱歌會唱到半百，哈哈，除左感恩、感激，呢段咁長人生路程，回頭望係非常精彩，亦從沒遺憾。今日來得嘅朋友，我知你哋已經係我家人， 感謝你哋多年來選擇咗我，聽住我嘅歌，同我一齊成長，我好耐冇喺香港表演，我唔想喊呀，喊完鼻涕又變痰，唱唔到好唔抵。」唱完一系列歌曲後，楊千嬅隨即分享心底話，講講吓仲忍唔住落淚，直言自己經歷咗好大考驗，過程並唔容易，但表示回望自己人生係笑比喊多，過去嘅高山底谷得到好多養份同智慧；楊千嬅坦言之前嗰幾年都幾難過：「你見到我唔係好出嚟，躲埋咁耐，時肥時腫，比人影到畸形樣，哈哈哈，新時代網絡風暴係一個好震憾嘅經歷，我乜都遇過晒，幾十歲人我同自己講，有咩未見過？ 真係低處未算低，當我經過呢段日子，我發覺自己真係好強大，今日好感恩，上天比我係有力氣時，經歷呢個浩瀚人生。」

楊千嬅續指，自己試過死頂，刻意扮開心結果嚇親好多人：「嗰一刻，我好迷惘，唔知發生咩事，好困擾。見到自己嘅CD碎到一地都係，心好痛，連朋友都唔敢再關注。你鬧我冇問題，唔好鬧埋我啲朋友，諗住一個人撐唔好害人。我曾經覺得好恐怖，選擇『熄機』唔睇唔理唔聽，休息畀自己時間消化。」另外，楊千嬅又指全靠歌迷畀好多鼓勵佢先能重新振作，其中一個歌迷更將佢多年來上台講嘅得獎感受剪輯成3分鐘片段畀佢；楊千嬅憶述自己當時一路睇一路喊：「原來我同人講過嘅嘢，曾經幫到人，最後今日幫番我自己，我發現困難時只有係自己救自己，唔好放棄自己。」又提醒歌迷要記住唔好放棄：「記住有心跳就有希望，唔好放棄自己。我希望你哋可以愛自己，要有健康身體，永遠面對挑戰最高難度時，加油提升自己嘅能量，遇到最壞最唔開心嘅事，都係可以逆轉。入得呢個會，有番咁上下POWER，我進化你哋同我一齊進化，一齊進步！呢個係『千嬅群英會』嘅精神，我五十歲都做到，你哋咁後生，你哋可以活得更精彩！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！