【楊秀惠宣布離開無綫】效力無綫16年楊秀惠認離巢 《十八年後的終極告白》成告別作

近年無綫鬧演員荒已經唔係新鮮事，唔少小生花旦及綠葉演員都宣布離巢，最新就有啱啱榮升人母嘅楊秀惠。今日有報道指楊秀惠喺年初已經完約，離開效力16年嘅無綫，所以《十八年後的終極告白》喺佢嘅告別作。

報道指楊秀惠離巢嘅原因同其他藝人唔同，佢嘅美容生意越做越大，加上早前打算與男友結婚及計劃造人，楊秀惠作為包薪藝人，原本諗住上年年中賠錢提早離巢，經無綫挽留下，佢決定繼續留低。不過因為疫情嘅關係，楊秀惠已經滯留喺大馬差唔多半年，幾時返香港都未知。而無綫亦為咗開源節流，所以亦同意楊秀惠賠錢提早解約。

現年35歲嘅楊秀惠，喺04年由馬來西亞離鄉別井嚟香港參加《2004年國際華裔小姐》五強止步。楊秀惠加入無綫後，拍攝多部劇集，例如《赤沙印記@四葉草.2》、《仁心解碼》、《萬凰之王》及《當旺爸爸》等等，不過一直都半紅不黑，直至喺《鬼同你OT》中「羅麗花」一角先開始廣受歡迎。前年楊秀惠喺《大帥哥》中艾妞演技大爆發，成功搣甩「花瓶」形象。

佢喺熱播中嘅《十八年後的終極告白》飾演聾啞人士謝家倩，佢喺拍攝過程要記大量手語，同時眼神同表情又要配合手語，真係一啲都唔簡單呀！佢喺劇中係暗戀陳山聰飾演嘅阿一，佢哋近排終於成為情侶。最新就講到佢哋一齊去睇屋，及阿倩已經懷有阿一嘅骨肉。唔少觀眾睇咗楊秀惠嘅演出後，大讚佢嘅演技。

喺今日下午，楊秀惠喺社交網站宣布離巢消息，佢多謝大家支持同多謝無綫俾咗好多機會佢，留言話：「多謝大家一直以來的支持🙏我和TVB的合約在早一段時間已經結束了。首先想多謝TVB一直以來都給了我很多機會，是我去香港以後一直工作的公司，很感恩，係呢兩年間TVB不斷安排左好多好好嘅劇集角色俾我，亦都有飛去外地嘅旅遊節目同其他唔同嘅節目主持工作俾我，但因為我真係時間上配合唔到，所以都未能參與，覺得好唔好意思。非常感謝TVB以及所有同事咁多年來嘅幫忙，請原諒我無法親自一一謝謝你們，非常感謝🙏❤之後我會繼續努力，照顧好家庭和生意。希望大家會繼續支持我❤️」唔少藝人及網民都紛紛留言同佢講加油同支持佢。