業餘籃球賽燥底球員打球證片段瘋傳 周柏豪真係做咗「旁觀者」同場仲有《中年好聲音2》甘永傑

而家唔少籃球友都會打俗稱「私league」嘅業餘籃球聯賽，過下波癮又有爭冠目標，唔少人打得零舍投入，甚至當自己球星上身！

近日網上流傳一場某「私league」比賽片段，一名球員被球證吹罰技術犯規後，竟然先推撞球證，再出拳打球證後腦。之後兩隊作賽球員都衝入球場拉開打人球員，而遇襲球證就問場邊拍片工作人員「影唔影到？」。後來大會報警，球賽腰斬。

⇓⇓⇓⇓⇓⇓⇓⇓⇓事發片段⇓⇓⇓⇓⇓⇓⇓⇓⇓⇓⇓⇓⇓

facebook專頁籃神發帖文指，打人球員嘅隊友曾主動解釋事件，並表示「唔好意思！佢場場都係咁」。而警方到場了解情況後，雙方和解，最終沒有人被捕。而該專頁另外post出一條影片，疑似施襲者原來喺另一場球賽中已經有推撞球證，似乎真係一如佢隊友所講「佢場場都係咁」。

有傳媒翻查比賽資料，發現當晚賽事嘅球員當中，原來周柏豪係打人者對戰球隊「呂青」嘅球員，當晚柏豪都有落場，身穿黑色8號波衫，事發時佢甚至企喺附近。而打人者嘅隊友當中，其中一位係參加《中年好聲音2》嘅甘永傑，甘得知球證話要報警之後，即刻爆咗句「唔使吓嘛」。42歲嘅甘永傑係建築師，喺《中2》嘅60強一對一PK賽中被淘汰。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！