河國榮離世｜TVB御用鬼佬 熱愛香港地為張國榮取藝名 《亞視永恆》一唱成名

「TVB 御用洋人」河國榮昨晚（2 日）於西貢家中離世，享年 58 歲。有傳其太太 Bonnie 去年逝世，對曾患抑鬱症嘅河國榮打擊甚大。而河國榮近幾個月亦冇再更新個人 IG。

生於澳洲嘅河國榮本來讀醫，期間因為來自香港嘅同學介紹而愛上香港流行曲及文化，更成為張國榮 fans。河國榮 1988 年決定來港教書，因為想入行而學廣東話，並獲 TVB 簽約，成為旗下首位非華人藝員。原名Gregory Rivers 嘅佢因為喜歡張國榮，所以將自己姓氏譯成河，從而取藝名河國榮。

河演出過近 300 套劇集，因為外國人身份，經常被安排演警官、企業高層、傳教士等。河國榮 2008 年離開TVB 後向外闖，曾經為周潤發指導學習英文，2016 年為毛記電視嘅頒獎禮演唱惡搞歌《亞視永恆》而受網民正評支持。2019年河同TVB關係密切嘅邵氏兄弟簽約，到去年約滿離開。河最近期演出係喺ViuTV劇集《野人老師》演末期癌症病人。

近年河國榮遭遇唔少逆境，2017 年切除右耳後嘅惡性腫瘤，之後又因為心臟問題做過2次手術。而其愛犬又因為年老多病需要治理，令河國榮一度欠卡數同朋友借款 80 萬元，好在後來有相識多年鄰居以百萬酬勞邀請佢做門鎖代言人，暫時解決財困。

河國榮當年來港教英文時，同學生之一嘅 Bonnie 張浣澄交往，二人拍拖未夠一年時，河國榮簽證出問題，於是決定結婚。由於 Bonnie 早年心臟出現毛病，因此未有下一代，但無損二人感情，多年來十分恩愛。

【珍惜生命｜防止自殺求助熱線】

香港撒瑪利亞防止自殺會： 2389 2222

生命熱線： 2382 0000

明愛向晴軒： 18288

社會福利署： 2343 2255

撒瑪利亞會熱線(多種語言)： 2896 0000

東華三院芷若園： 18281

醫管局精神健康專線： 2466 7350

「情緒通」熱線： 18111

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！