香港4大法式餐館推介 最新米芝蓮一星法國菜、經典法式餐館重開

想喺香港體驗法式風情其實唔太難，一齊睇吓有邊間法國菜好食！

法國蔚藍海岸風情餐廳 LPM Restaurant & Bar

以法國蔚藍海岸風情為主打，唔單只環境高雅，仲有一系列精緻、融入地中海風味嘅菜餚。最近餐廳新推出嘅商務午餐菜單，啱晒附近返工又想食好啲嘅朋友。全新商務午餐菜單，以法國地中海風味為靈感，結合當季時令新鮮食材，烤鱈魚簡單但出色，用上炭烤爐煮出獨特香氣，配埋櫻桃番茄同紅蔥，鮮甜豐富。橙香烤鴨腿外皮香脆，肉質鮮嫩多汁，加上橙香點綴，味道層次非常豐富。餐廳仲有新增嘅半私人包廂，非常適合朋友聚會或商務宴會，更可以私人定製菜單𠻹～

米芝蓮一星殊榮 Racines

呢間今年獲得米芝蓮一星嘅餐廳，以全新秋季嚐味菜單迎接初秋～菜單充滿驚喜，頭尾均選用雅枝竹（Artichoke），為法式經典注入新意。第一道鴨胸沙律加入微苦嘅雅枝竹、濃郁嘅鵝肝、松露作搭配，味道互相平衡。另外以傳統法式馬賽魚湯爲靈嘅紅衫魚兩食，先將紅衫魚自然風乾三日，提升鮮味，再以鹽、糖、柑橘醃製，製成冷盤；第二部分則以慢火輕煎魚肉，外層金黃焦脆，內裏嫩滑。仲有兩道秋季招牌係香烤乳鴿同碳烤Brandt牛肉眼扒。乳鴿配搭秋季無花果，酸甜味平衡濃香嘅鴿肉；而牛肉眼扒則以備長炭烤出炭火香氣，令人齒頰留香。

經典法式美饌 懷歐敘

經過三年，呢間位於香港港麗酒店嘅法式餐廳重新開幕！餐廳呈現多款經典又精緻嘅法式料理，招牌菜式當中包括法式前菜焗田螺及豪華海鮮拼盤。想試頂級肉類嘅客人絕對要試吓法國夏洛萊牛柳或美國斧頭扒，兩者肉質豐厚、鮮嫩多汁，最啱同朋友分享。龍蝦湯經過6小時熬製，湯底香濃，滿載龍蝦嘅鮮甜精華。最後要試埋即點即製嘅法式梳乎厘，外層金黃酥脆，內裡綿密，為整頓法式饗宴畫上完美句號。

現代法式餐廳 Auor．月

一間位於香港灣仔嘅現代法式餐廳，由著名新加坡籍主廚Edward Voon主理。餐廳注重將亞洲風味同精緻嘅法式烹飪技藝巧妙糅合，展現咗主廚兼具烹飪亞洲同法國傳統料理嘅多才多藝。當中幾推介西西里紅蝦他他，加入咗帶濃厚新加坡風味嘅鹹蛋黃同炸魚皮，中層係滿滿魚子醬以及紅蝦他他，係令人驚喜嘅配搭。焗澳洲青蟹靈感則來自新加坡嘅胡椒蟹，蟹肉已預先拆殼，加入調味料後以西式方法烤焗，面層灑上印度香料、炸過嘅西米脆脆，香口惹味。留意餐點會不定時更換啊～

文：Yanica
編：Cathy