雅虎香港新聞 
深圳一日遊｜$300勁食行程：文青小店打卡＋Line Cafe 下午茶＋麻辣火鍋！
深圳近年愈開愈多文青小店、靚Cafe，唔少香港人都會趁住周末，約班好朋友一齊上影相打卡！唔想每次來來去去，都係飲喜茶，食個海底撈就返香港咁齋，不妨參考一下以下的特色小店，就趁住今個周末，約閨蜜一齊上去玩啦！
Text： Cynthia｜Photo：Fion
$300內 勁食行程推介
比起香港，深圳消費真係低好多，以下面4間cafe 為例，每間人均大約RMB 50-80就可以捧住個肚走。甜品的價錢大概在RMB20-40左右，比起香港真係平好多！而麻辣火鍋兩個人食會貴少少，多人share 湯底的話，叫好多都係每人百幾蚊！
深圳2人同遊 一日消費 | |||
午餐 | 逸塔花園 | 大蝦牛油果米紙 | RMB32/HK$40 |
|
| 薯條 | RMB22/HK$27 |
|
| 雙人特調水果茶 | RMB45/HK$56 |
下午茶 | 領間 | 雙人銀針茶 | RMB52/HK$65 |
|
| 半熟蛋糕2件 | RMB38/HK$47 |
晚餐 | 大龍燚火鍋 | 湯底+6樣食物+飲品 | RMB257/HK$319 |
車費 |
|
| 約RMB20/HK$24 |
|
|
| 總數：HK$295/人 |
深圳美食遊 必去南山區
深圳除咗幾個港人最熟悉的大商場：萬象天地、歡樂海岸、華僑城外，想搵文青特色小店，一定要去南山區！最近的口岸是深圳灣，出發到南山區的小店一般車程在30分鐘左右，可以一日內玩完成個區域！
#01 熊大迷必去 可愛Line Cafe
香港有不少熊大迷，但可惜等極都等唔到Cafe開業，最近的Line Cafe 開在深圳，fans 點都要去朝聖一下！Line Cafe 位於海岸城2樓，最近的地鐵后海站D1出口，一出去就見到，非常易搵！
Line Cafe 的打卡影相位超多，門口大大個熊大任影唔嬲，店內仲有巨型Choco 歡迎你！特別的粉紅色區域設計成熊大、Choco 的家，可以慢慢影相。
餐飲方面選擇都唔少，首推下午茶時段的2人tea set，RMB138包兩杯飲品，鹹點、甜點加埋有6款，煙肉卷最好食，而迷你漢堡上面仲印咗熊大個樣，細節加分！
甜品同樣好吸引，瑞士卷、布甸、奶酪杯等統統都係熊大、Cony的造型，可愛到唔捨得食！
除了Cafe 輕食外，另一邊還有酒吧區，晚上會提供手工啤酒，可以配Burger、薯條，同熊大飲返杯！
飲飽食醉之後，又係時候掃貨幫助消化！有過千件貨品的Line Store可以慢慢掃，產品比香港更加齊全，仲有超巨型的軟綿綿公仔賣！
Line Friends Cafe & Store
地址：深圳南山區文心五路33號海岸城購物中心二層203-205舖
#02 抹茶控必去 初代抹茶
去完Line Cafe 覺得未夠飽，不妨行多5分鐘，去附近的初代抹茶食甜品！喺全中國有一百間以上分店的初代抹茶，採用來自「丸久小山園」的抹茶粉，有品質保證！
初代抹茶雖然細細間，2層的位置唔算多，但勝在坐得都幾舒服，仲有一個和室小間！加上設計非常日式，櫻花、各種日式小擺設，都非常適合影相！
主打的原味抹茶千層好受歡迎，足足有40層的千層蛋糕，20層抹茶cream 加20 層麵皮，食落非常creamy 軟滑，而且一件只需RMB28，比香港好多甜品店平一半！
另一款必食的抹茶大福，RMB22 有兩大粒，店員表示係剛剛整好，所以糯米皮會較淋。用叉一壓就可以感受到大福的軟綿，好治愈！入面是抹茶忌廉加粒粒紅豆，一啲都唔會濟！
飲料方面的選擇亦多，喜歡芝士奶蓋的話大推抹茶芝芝，怕太濟的話可選抹茶拿鐵，一開蓋就可以聞到抹茶的香味！
初代抹茶
地址：深圳南山區文心六路海岸城東座二層216號
#03 花海夢幻Cafe 逸塔花園
想在深圳搵一間有質感的文青Cafe，絕對不是難事！南山區的逸塔花園，距離最近的桃園站大概行8分鐘，不算難找！
逸塔花園非常大間，一入到去就會見到闊落的用餐區，左邊的區域是圖書館，可以休閒地閱讀，而右邊有大量的植物做裝飾，有種在大自然野餐的感覺！
想要影靚相的話，一定要去右邊的用餐區，一大片的落地玻璃，在陽光的照射下影相超靚！其中一面牆被設計成一格格，放滿細細個盆栽，好適合影相！
食物方面的選擇很多，唔好以為cafe 就只有甜食，逸塔花園主打泰國菜，網友食過大推辣烤雞翼、菠蘿炒飯、冬蔭功湯，而記者實試牛油果蝦卷，用料實在又清新！
除了泰式小食外，最好食的絕對是薯條，熱辣辣又夠脆！士多啤梨鬆餅相對來說比較一般，食落較濟，士多啤梨連葉都無剪走，食嘅時候都好唔方便！
逸塔花園
地址：深圳南山區金雞路田廈翡翠明珠七巧國2樓
#04 休閒文青書店 領間
深圳的書店好多都唔係就咁買完書就走的地方，而係會連住cafe，讓客人買完之後，可以即時坐低慢慢睇！位於南山區的領間Linger，就係其中一間有風格的書店。
領間唔算大間，餐飲區大概只有10張枱，平日下午去到人唔算多，可以安安靜靜地食個cake，睇睇書，放鬆一下。
店內只有小蛋糕供應，記者試了朱古力、士多啤梨芝士蛋糕，味道統統不錯！食落唔會過甜，亦無奇怪化學味，好值得一試。
怕食太多甜食會濟，推薦叫一壺茶同閨蜜慢慢飲，白色的茶壺好有質感，淡淡的茶香好舒服。店家仲準備了果乾，酸酸甜甜配茶一流！
現場的書可以借完即睇，而樓上都有個小區域，係有免費翻閱的藏書，拎住壺茶上去，邊飲邊睇書，非常放鬆！
領間
地址：深圳南山區科苑大道阿里晚晚大廈T4座1層27號
南山大道 火鍋一條街
去深圳次次都係食海底撈，覺得好無新意的話，其實各大商場都有好多其他人氣火鍋店，而位於南山大道的火鍋一條街，有多間出名的火鍋店，其中有好多間已經開到香港，今次就試試香港未有，又好受歡迎的火鍋店大龍燚啦！
正宗麻辣火鍋 大龍燚
來自成都的大龍燚喺深圳非常出名，記者平日6點左右到達，門口已經排晒長龍，好彩仲有細枱可以坐！一入到去，就聞到超重的辣椒味，平時無食開辣的話，可能會頂唔順！
店內採微信落單，可以自己用電話揀湯底、食物，落單要鴛鴦鍋微微辣，中間白湯，外圍是佈滿辣椒的紅湯，聞到都已經流晒口水！
食材的選擇比海底撈少，主要是少了海鮮，而且無得揀半份，人少的話唔可以試太多。不過每次都會食的肉類、丸類、菜、菇等都有齊！
牛肉肉味濃，一碟RMB38唔算貴，而牛黃喉、水魷等打邊爐必食，落紅湯吸辣汁夠過癮！雖然只係微微辣，但已經比海底撈辣好多，重口味者必試！
怕辣的話，可以開一罐罐的芝麻油，倒入碗再加蒜、蔥，更加惹味！唔好以為油淋淋好可怕，呢個係四川人的正宗食法，去食的話不妨一試！
食完太多辣嘢，可以試試店內最出名的炸麻糬，炸好的麻糬點一點黃豆粉同醬，入口煙韌好香口，打完邊爐必試！
大龍燚
地址：深圳南山大道2009號一樓D區
下一頁：深圳一日遊｜深業上城 最新大型商場：喜茶、京盛宇
下一頁：深圳無印酒店 率先試住報告｜每晚950人仔包早餐 享受全套無印產品！
延伸閱讀：
