港女講日：窿穿襪 染頭髮 裙太短 日本女生見家長10大禁忌

日本係一個著重禮貌的地方，一相識便按照彼此的年齡及階級，使用相應的表達方法，好似尊敬語、謙遜語、叮嚀語之類。而日本年輕人除了返工用尊敬語之外，原來第一次見家長都一樣，務求搏得好印象。最近日本網站《グーランキング》票選出見男友家長時的10大禁忌，究竟同香港人又有無唔同呢？大家一齊睇下！

第10名：邊聊天邊睇電視
同男友及其家人坐係梳化邊睇電視邊傾計，即使話題有幾悶都好，千萬不可發呆或一直看電視，這是相當無禮貌的行為。所以無論點都好，打醒12分精神，睇少陣電視。

第9名：飲醉酒
一家人吃飯，唔多唔少都會飲下酒，但飲時飲唔好飲太多，一陣飲大咗發癲或失言就失禮。

第8名：髮色太淺
日本父母大多都好守舊，最想你係黑色頭髮、長裙及膝、唔煙唔酒、又能相夫教子的乖乖女 ，所以女仔最忌髮色太淺，但深咖啡色可能還好，當然黑髮最好不過啦！

第7名：吸煙
呢點唔止日本家長，相信香港父母都唔想「新抱仔」吸煙，呢個行為絕對會破壞氣質，印象扣曬分，忍下口啦！

第6名：遲到
日本人最忌遲到，工作是也，見家長也是。如果有咩突發事情，最好先告知對方，否則的話，到時大家黑晒面，你嘅日子都唔會好過。

第5名：穿窿襪
係日本著穿窿襪係一件好老尷並唔太尊重的事情，尤其係腳趾頭位置，夠晒搶眼。如果真係唔小心著咗穿窿襪，上去前買過對，如果無時間的話，索性除咗佢。

第4名：戴太多首飾
除了行為舉止外，穿著打扮也很重要。過火的打扮令人覺得你唔夠踏實，而飾品太多，好似耳環、戒指、手鍊、項鍊等通通上身，兩個字：浮誇。

第3名：低頭族上身
食飯同傾計過程中，如果對方一直低頭玩電話，分明就係唔尊重表現！所以到咗男友家，最好收埋電話，咁就實唔會出事啦！

第2名：沒有使用敬語
之前提過，日本人超注重年齡同階級，所以見男友家長必須使用敬語，否則又係無禮貌的表現。

第1名：裙子、褲子穿太短
邊有家長想「新抱仔」著到袒胸露臂？所以見家長最忌著迷你裙或超熱短褲，事業線也不宜露出。