【港孩系列】三至五歲小朋友只有17%識自己整早餐 但58%識玩電話

「港孩」成日都畀人話「三低」，即係自理能力、情緒智商和抗逆力都低。時不時都會聽到啲新聞講咩小六都唔識自己洗頭呀，有事無事都嗌工人姐姐，直情「衣來伸手，飯來張口」，緊係咩都做唔到啦。

呢個情況唔係只係出現喺香港架，英國《每日郵報》轉述咗AVG技術公司嘅一項調查，發現3-5歲嘅小朋友有58%識用手機，但係每6個細路得一個知點樣整早餐。其實我都唔明，手機啲用腦game可以玩得咁純熟，簡簡單單整個燕麥加牛奶早餐，又或者係塊麵包上面搽啲果Jam有幾難？

而紐約公司MiMedia都做咗個1,000人調查，近60%父母話佢哋嘅小朋友未識講嘢之前就已經會用iPad嗰啲觸屏（Touch screen）電子嘢，約50%父母表示佢哋三歲以下小朋友都好鍾意自拍。鬼咩，47%父母每日至少up一張小朋友嘅相上Facebook呢啲社交媒體，正所謂近墨者黑，自自然然都搞到啲細路只係鍾意玩電子嘢啦。

其實講到尾咪又係怪獸家長問題，成日話啲細路只係識打機，如果當初你用心陪佢玩，教佢踩下單車、一齊整下早餐，而唔係就咁畀部iPad佢就算，佢就唔會咩都唔識做變港孩啦！唔好成日用忙做藉口，如果你唔用心喺佢仲細嘅時候做開始多啲陪佢玩同傾計，佢哋大咗你就後悔莫及啦⋯⋯