溏心風暴「大細契」李司棋關菊英激罕合體惹回憶殺 網民笑指：阿樂同阿愁

TVB經典劇集《溏心風暴》系列被譽為神劇之一，角色「大契」李司棋和「細契」關菊英鬧交對白字字珠璣，睇到觀眾入晒戲。已淡出幕前嘅關菊英曾於2019年傳出病重須抽骨髓治療，雖然李司棋當時有為其澄清健康狀況，但直至前年開始，網民見到關菊英出現於圈中好友聚會照，而相中嘅佢亦精神奕奕，先至力破患病傳聞。近日，李司棋於社交平台分享與關菊英聚會照，勾起網民陣陣回憶，更被網民笑指係《玩轉腦朋友》「阿樂」和「阿愁」。

李司棋PO出多張合照，並寫道：「身邊嘅朋友周圍飛去旅遊，只要知道她返咗嚟，一定約埋大家聚下，多謝菊姐請食好味日本菜」，一班網民留言指睇住張相都有聲，甚至懷念《溏心風暴》：「乜攞女咁好良心發現請荷媽食飯」、「我突然想睇返溏心風暴，好懷念」、「阿Sa見到阿姐第一句有無講：#阿姐乜你唔keep㗎」、「講不出聲講不出聲～～」、「細契今次有冇陰謀」、「Sa姨應該係咁嗌野食，然後搵荷媽埋單」、「呢幅相有background music（背景音樂）」等等。仲有網民留言：「阿樂同阿愁」，令李司棋親自回覆三個笑到喊emoji。事關，不時都有網民覺得李司棋戴粗框鏡個樣好似阿愁，李司棋因而於上月份迪士尼與彼思的動畫《玩轉腦朋友2》上映前，到銅鑼灣時代廣場《玩轉腦朋友2》打卡場景與情緒專員「腦朋友」阿愁合照，仲扮阿愁表情，相當玩得。

另外，李司棋扮完阿愁之後，更有網民提議將《玩轉腦朋友》和《溏心風暴》結合，仲為《玩轉腦朋友之溏心風暴》選角，除咗李司棋係阿愁，仲建議關菊英演阿樂，認為動畫裡嘅阿樂同阿愁成日並肩作戰，所以「大契」同「細契」做係最適合；而米雪就演阿憎，夏雨就可以演阿燥。所以又有網民喺李司棋同關菊英合照下留言：「叫埋夏雨米雪黎，夏雨=阿怒，米雪=阿憎」、「if（如果）佢地四個一齊拍個廣告都好」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！