一人燒肉推介2023 尖沙咀親民高質燒肉、旺角$48燒肉套餐

天氣終於轉涼啦！呢啲天氣最啱就係燒肉，今期介紹幾間近年先開嘅一人燒肉店畀大家，就算獨食都無問題。

親民價黑毛和牛 燒肉801

呢間日式燒肉最近好有人氣，喺尖沙咀同荃灣都有分店，主打九州產唔同部位嘅黑毛和牛～全部套餐都可選一人或二人份，想經濟啲又食到和牛可試招牌 801 套餐，包括大判燒！黑毛和牛肩胛肉、腹前牛小排及蔥鹽燒雞腿肉，大判燒一片又大又薄，輕輕燒一燒就可以點埋蛋漿食，油脂分布平均又重牛味。想再高級啲可以叫全個餐都係和牛嘅黑毛和牛盛，除咗黑毛和牛肩胛肉仲有黑毛和牛小排，肉質嫩口、肉汁豐富。

荃灣抵食之選 一人燒肉屋

令人驚喜嘅新燒肉店，價錢方面真係好抵食，最平 $48 就可以食到一個安格斯牛胸花套餐，以呢個價錢嚟講肉嘅質素唔錯～亦推介牛舌套餐，薄切安格斯牛舌燒到脆脆地好爽口。唔食牛嘅朋友可以選擇燒豚肉套餐，用上熊本豚五花肉，燒過後焦香撲鼻，送飯一流。所有套餐嘅飯都可以加紫菜同生日本蛋，配埋燒肉無得輸。想食豐富啲更可以添加海鮮、配菜、甜品等。

最平$48燒肉套餐 燒肉駅 一人燒肉·丼飯

旺角呢間燒肉一樣主打抵食，最平嘅套餐都係 $48／份。而且環境乾淨企理，抽風設備良好，食完唔會成身燒肉味呀。想食得精緻啲推介大家食鹿兒島和牛盛套餐，每塊牛肉都有靚靚雪花紋，分別有牛仔骨、肩胛肉同西冷，前兩者牛味濃啲，西冷肉質最軟嫩。豚五花、雞松板、雞腿肉套餐都值得一試，雞松板即係雞頸肉，口感爽脆。豚五花脂肪同肉比例均勻，點埋秘製蒜香牛油醬汁更滋味。

外星人主題路軌燒肉 EaT燒肉

以外星人作主題嘅燒肉餐廳，更設有迴轉路軌將食物直接送到客人面前，好玩又好食。環境乾淨企理，一人同多人嘅位置都有。一樣供應唔同嘅肉類配搭，幾推介特級牛五花配富士蘋果地雞肉，地雞肉肉質緊實細緻，帶有淡淡蘋果香氣。黑毛豬肋條都唔錯，一啖咬落去有爆汁感覺。另外除咗宮崎 A5 和牛仲有韓國 1++ 韓牛，前者就油脂豐富啲，後者牛味就好重，揀邊款就睇大家口味啦。

東京人氣過江龍 牛繁一人燒肉

呢間嚟自東京嘅親民價過江龍燒肉店，喺旺角、屯門都開咗「一人燒肉實施店」，以「SPEEDY & YUMMY」為理念，畀大家享受食到燒肉又有質素嘅 Me Time。最平嘅套餐都係 $48，包 100g 牛胸花肉、白飯、漬物或泡菜同湯。想食豪啲？亦有日本十勝 A5 和牛肩胛肉套餐、特選三重奏等選擇，後者有齊十勝 A5 和牛肩胛肉、汁燒牛胸花、味噌豬五花，保證食肉獸滿意。

文: Yanica
編: Cathy.H