狀王之王｜劇情懶搞笑好尷尬 王浩信演技網民唔buy：抄星爺style

TVB新劇《狀王之王》搵嚟視帝王浩信、姚子羚、金剛、王子涵、陳楨怡、林子聰、張達明、陳浩民及鄧伊婷莊鍶敏等人演出，劇情主要講述聰敏機靈嘅宋世傑（王浩信飾）曾以「秀才」資質考獲「榜眼」資格，不過佢無心戀戰官場，只係暗中相助同試考生何守信（林子聰飾）中舉，而佢就同好友阿九（金剛飾）浪遊天下。直至佢被捲進「蜘蛛精殺人案」，宋世傑及阿九因與案中其中一名死者有過節，而被鎖定為頭號殺人嫌疑犯。最終佢成功憑三寸不爛之舌為自己洗脫嫌疑，並決定潛入知名妓院「倚春閣」進行調查，其間遇上美麗又神秘的老闆娘葉三娘（文凱玲飾），以及武功高強的青樓護衛玲瓏（姚子羚飾）。劇集喺前晚（29日）首播，而家就同大家睇下網民有咩反應啦！

劇情悶兼懶搞笑
《狀王之王》播出兩日，劇情就講到宋世傑為自己為洗脫嫌疑後，佢同守信打賭，可以幫佢查出「蜘蛛精殺人案」幕後真兇，所以不惜與阿九男扮女裝混入倚春閣，期間倚春閣有客人大吵大鬧，世傑憑口才成功化解。宋世傑幾經調查後，推斷倚春閣頂樓有異。雖然劇集嘗試製造唔少笑料，不過一班網民都唔太受落，紛紛留言給予負評，例如「又要懶搞笑」、「又炒冷飯」、「好悶，想撤退」、「真係笑唔出」、「呢套都幾悶 想搞笑但係唔好笑」、「呢套嘢冇以前睇宋世傑嘅味道」、「其實成件事好尷尬」、「唔知睇咗乜! 好悶! 反而本尊就位好睇!」、「舊瓶新洒，無創意，唔使睇」及「又是鬧劇一場」等等。

王浩信演技網民唔buy
王浩信為演活狀王宋世傑，除咗首度為劇集剃頭之外，佢施展渾身解數，不惜以極誇張表情又喊又笑落力演出，不過網民睇完佢嘅演出後，紛紛留言表示唔buy，例如「黃（王）浩信把聲」、「見到Signal Wong都唔想睇」、「eu，路人甲未幾好。係都要跟星爺後面抄到悶賴好笑咁。」、「Signal wong連把聲都扮星爺」、「真係抄星爺style」、「黃（王）浩信演到成個方唐鏡咁」、「王浩信做呢種瘋狂喜劇唔掂」、「呢套無好睇，息勞好作狀」、「王浩信完全吾得啦 佢每一秒都Copy緊周星馳 係每一秒 完全冇自己」|、「信號王真係做唔到果種好搞笑嘅感覺」、「當你唔尷尬嘅時候，就係人哋尷尬！浩信，你贏！」等等。

配音好出戲
《狀王之王》主要演員係演出時都係講廣東話，不過劇集好奇怪地再以廣東話為演員配音，有時仲要唔多對嘴，所以睇到一班網民好唔舒服，留言話「配音好怪，搞到好出戲」、「粵語郡要配音，把鬼」、「聽到啲配音都唔想睇啦」、「啲收音好怪」、「返大陸拍學埋晒啲衰嘢全部都唔係現場收音， 全部都冇曬背景音好鬼難聽」、「係咪配音架？好似唔多對嘴咁既！」、「點解全部人都係配音」、「姚子羚口型怪怪地，好似都要配音，姚子羚聲演姚子羚，咩玩法。」、「Tvb現在的配音真的好出戲...」及「睇到全劇都係配音夾口型己經無興趣, 轉台!」等等。

好有星爺影子
《狀王之王》由張達明監製、林子聰任總導演，再加上劇情及演員嘅演出風格，令網民覺得劇集好有星爺嘅影子，例如「抄九品芝麻官既又妓院」、「想做到好似周星馳風格，但笑唔出，而且覺得好老土，反而翻睇周星馳啲戲仲好好笑」、「叫肥仔聰做監製 等於照抄周星馳風格」、「又係星影子」及「個個都想扮星爺，可惜吾好笑，個個以為男扮女好笑，其實我想吐」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！