王祖藍兼任TVB數碼內容主管 首席創意官上場一年 9大綜藝節目邊幾個石沉大海？

據內部消息及傳媒報導，TVB近期有內部通告宣佈，上任一年左右嘅首席創意官王祖藍，將會兼任數碼內容部門主管。

有傳身兼兩職嘅祖藍，近期帶住王浩信、高海寧同張振朗等一線藝人北上發展，原因係同兩大TVB高層曾勵珍及樂易玲不和，而事件導火線係祖藍親自出口氹掂由加拿大回港嘅鍾嘉欣，喺台慶頒獎禮上爆冷輸俾林夏薇，令到祖藍好勞氣。不過日前王祖藍搵外事部發文解畫，表示近日忙於統籌TVB幾個和內地平台深度合作項目，喺內地發展唔錯嘅祖藍因此負責做先頭部隊，似乎一早預告咗今次兼任新崗位嘅消息。

去年初TVB搵曾志偉出任副總經理（後來升任為總經理），隨即引發連場人事調動，高層余詠珊同李寶安先後走人。曾志偉埋位後積極埋班，搵人脈夠廣嘅何麗全執掌星夢娛樂，北上搵食多年嘅徒弟王祖藍亦回巢擔任首席創意官。舊年3月TVB召開《超級綜藝隆重登場》記者會，強勢推介9個全新節目，部份係曾志偉、王祖藍連同幕後人員度出嚟。不過當中有幾個反應麻麻，甚至已經石沉大海。

當日介紹嘅9大節目當中，類似《歡樂今宵》形式嘅《開心大綜藝》係重點製作，本來安排4月中起逢星期日晚出街，而第一集嘅7天跨平台收視都有24點嘅好成績，但係口碑麻麻，被網民負評老土又尷尬，收視無力再升。《開》做咗10集就無聲無息地無再出現，夏天特備嘅《開心大綜藝之暑假玩到盡》都係掛個名而已，收視亦唔見得好。

銳意改革嘅《勁歌金曲》去年4月再度被安排喺星期日黃金時間播出，迎頭硬撼ViuTV嘅Chill Club，但係收視強差人意，近期已打回原形，喺翡翠台得返15分鐘時段，1小時足本版只有J2播放。

稍為有迴響嘅係藝員配音真人show《好聲好戲》，收視同外界反應都較為突出，但被指係扮襲內地同類節目《聲臨其境》。另外幾個節目《大整蠱》、《日日媽媽聲》、《演鬥聽》、《諸朋好友（第2季）》都係水過鴨背。至於《尋人記》由新聞部主理，而且一早拍好，同2位高層冇咩關係。由前朝高層余詠珊主理嘅《聲夢傳奇》，曾志偉上場後有傳要暫緩播出，點知出街後收視慢慢爬升，總決賽收視更高達24點，比賽冠亞軍炎明熹同姚焯菲嘅演唱片段更加有過百萬次觀賞。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！