雅虎香港新聞 聖誕特集
【玩樂】第一次搞聖誕party就上手
如果你以為搞party就係打幾個電話call齊人再計人頭訂pizza……咁……都無錯嘅，不過若果你想一年一度大家玩得盡興就要花啲心思喇。
揀主題
聖誕主題咪就係聖誕囉！係，不過無人想著到聖誕老人咁參加party 嘅係咪？Bling Bling又好、七十年代又好、《怪誕城之夜》都好，諗個有趣啲嘅主題等大家參與度高啲啦。而且定好主題，無論佈置或者揀配樂都會就手啲。
諗活動
呀朋友個朋友想嚟仲帶埋佢個朋友，結果大家唔熟又無乜話題點算？除咗可以參考我啲另一篇 「袋住先Party話題」(link) 之外，你都應該準備定啲好似層層疊、UNO（比較多人識玩嘅Card Game/Board Game），再唔係諗定啲集體遊戲，至於輸咗駛唔駛除衫就睇清楚個guest list先諗清楚喇。
溫提
聖誕咁多party去，同時間應承幾個然後臨尾甩底係最常見嘅人性黑暗面。記住派對當日再confirm多一次，免得最後得小貓三四隻你眼望我眼對住一大檯聖誕大餐咁尷尬。
請埋鄰居
唔想玩到興起結果比人投訴兼警察上門叫你收聲，最好做法係：請埋鄰居一齊玩。就算佢婉拒唔嚟都記得要分件蛋糕拎杯香檳過去，起碼你叫做通知過佢大家俾面，投訴嘅機會都細啲啦。（咁當然都唔可以嘈得太離譜啦）
Party’s Over
唔駛怕唔好意思，預先估計派對完結時間，盡興過、時間到就可以通知大家趕尾班車或者幫手call的士。如果唔係，無得瞓都係小事，大家飲大兩杯開始Crying In The Party或者……嘔到一屋都係就麻煩晒……你。
