從「走鬼」賣貨到 9 間分店 環保超市每年拯救 255 萬件過期貨

Yahoo 新聞
更新日期：
本地環保超市Green Price專門售賣過了最佳食用日期3個月內的貨品。
本地環保超市Green Price專門售賣過了最佳食用日期3個月內的貨品。

【Yahoo 新聞報道】食品過了最佳食用日期，即使品質依然良好，大多難逃被棄置的宿命。本地環保超市 Green Price 專門「拯救」過了最佳食用日期 3 個月內的貨品，創辦七年以來不斷擴充，由工廈角落「走鬼」到擁有 9 間分店。創辦人之一的 Terence 接受《Yahoo新聞》訪問時表示，期望以平價吸引大眾嘗試其貨品，打破坊間對過期食物的誤解，令環保不再離地。

文字記者：盧珮瑤

攝影記者：HLKP

Green Price 於 2016 年成立，至今已有 8 間分店，下月更進駐九龍灣德福廣場開新舖，公司亦有達70個職員，創辦人Terence、Ben 和 Allison 創業時仍就讀大學二年級，今年登上福布斯（Forbes）社會企業界別「亞洲 30 位 30 歲以下精英榜」。

三人原為工商管理系學生，參與社創營時參觀「惜食堂」，得知該團體常獲贈過期食品卻因空間不足未能接收。加上外國有專賣已過最佳食用日期食物的超市實例，三人決定將概念引入香港，2016年勝出Good Seed社創點子比賽獲10萬元基金，正式成立Green Price。

「嗰陣無舖頭同warehouse，好難搵第一個supplier，叩門叩咗50至100個都無人reply」，幸得大學教授幫忙向做食品公司的友人取了第一批貨，讓三人在週末市集擺檔。公司創立翌年，他們於觀塘工廠大廈與朋友合租細舖位，「嗰時本身得一張枱，賣賣吓越嚟越多貨就整個架推出條巷度賣，一有消防嚟就要『走鬼』」。

創辦人之一Terence指，眾多貨品中零食最受歡迎。
創辦人之一Terence指，眾多貨品中零食最受歡迎。

基層市場不似預期

隨後該店曾進駐深水埗，主打基層市場，但銷情不如預期，半年後關閉，「我哋啲貨好多都係外國貨，一包薯片可能本身40蚊，我哋平一半都要20蚊，對佢哋（基層顧客）嚟講唔係太需要」。直至2019年於灣仔開店，目標客源終於變得清晰，「嗰度附近有間銀行，有啲高層、外國人著到好靚都落嚟買到期嘢，發現原來佢哋好buy呢個concept，覺得sustainability係大家都要contribute（貢獻）」。Green Price遂於工商區及大型住宅區擴充，如中環、將軍澳、沙田、荃灣等，目前每年拯救255萬件過期貨品。

本港預先包裝食物標示日期分為「此日期前最佳」（Best Before）及「此日期或之前食用」（Use By）。前者過期後仍可食用，大多用於罐頭、乾製或冷藏食物；後者指過期後即使外觀和味道無異，仍然不可食用，例如三文治、壽司、刺身等。

Green Price專售超過最佳食用日3個月內的貨品。Terence指，店舖目前主要向從事入口的批發及零售商取貨，「供應商要講得出啲貨有咩issue（問題）先會同佢入」，如部份貨品要轉換新包裝，舊包裝需全部捨棄，便可於Green Price售賣。

市面上大多奶類產品只會列明「此日期或之前食用」（Use By），Green Price只會售賣列明「此日期前最佳」（Best Before）的奶類產品。
市面上大多奶類產品只會列明「此日期或之前食用」（Use By），Green Price只會售賣列明「此日期前最佳」（Best Before）的奶類產品。
超市中亦有不少著品牌子的化妝或護膚品，圖為雪花秀磨砂面膜，市價為每支58元，店中只售39元，更尚有一年多才「過期」。
超市中亦有不少著品牌子的化妝或護膚品，圖為雪花秀磨砂面膜，市價為每支58元，店中只售39元，更尚有一年多才「過期」。

剩貨少於1% 定期測試及試食

為確保6產品安全，Green Price與浸大合作定期抽樣測試貨品營養成份變化；Terence與同事們亦會定期試食，「品質係無得做lab test，真係要自己taste，例如個薯片無咁脆，呢啲係味覺上嘅嘢」。部份貨品容易有油膱味，例如果仁到期便會下架，「我哋個宗旨唔係淨係安全，係要味道上無乜分別，要食唔出」。至於奶類貨品，Terence強調店中只會售賣「超高溫消毒法」（UHT）的產品，未開封可於室溫存放6至9個月。

Terence指，店內的奶類產品大多需精挑細選，必須售賣以「超高溫消毒法」（UHT）處理的產品，保質期才會較長。
Terence指，店內的奶類產品大多需精挑細選，必須售賣以「超高溫消毒法」（UHT）處理的產品，保質期才會較長。

為吸引顧客，超市內貨品多以五至六折出售。電子價錢牌會標示貨品原產地、市價以及到期日。到期後價錢牌會自動標示「已過期」並調整價錢，「我哋有個system去計，有啲貨品同類嘢少啲，個價會高少少；同類嘢大家compete（競爭）就會低啲」。Terence續指，為減少貨品棄置到堆填區，會定期做優惠，部份亦會捐到地區組織，「我哋好少剩嘢，係少過1%」。

超市使用電子價錢牌，以免造成紙張浪費之外，亦方便電腦系統隨時調整價錢。
超市使用電子價錢牌，以免造成紙張浪費之外，亦方便電腦系統隨時調整價錢。
電子價錢牌標示貨品名稱、到期日、市價、售價及原產地，一目了然。
電子價錢牌標示貨品名稱、到期日、市價、售價及原產地，一目了然。
貨品到期後電子價錢牌會自動轉為標示「已過期」，價錢亦會進一步調整。
貨品到期後電子價錢牌會自動轉為標示「已過期」，價錢亦會進一步調整。

不是清貨場

「我覺得我哋做環保，同出面有啲唔同」，Terence直指市面上環保產品「太離地」，難以吸引市民，「買無包裝嘅嘢，要拎個玻璃樽去入，仲貴過買一個包裝好晒嘅supermarket產品，咁係唔make sense（合理）」。他希望Green Price在產品和服務方面更大眾化，並與不同非牟利機構合作，向基層宣揚食品日期分類的知識，「通常會帶啲薯片，一包未夠期，一包到期，叫佢哋睇下有無分別，畀佢哋自己試最好」。

Terence認為大眾對過期食品仍有根深蒂固的誤解，Green Price就是向客人提供試食及試用此類貨品的渠道，「唔想好似清貨場咁，掉出嚟你自己執。其實佢哋到期都有個價值喺度，唔代表你係買緊啲inferior goods（劣質商品）」。

Terence指，超市分店裝潢光猛，貨品亦必須排列整齊，不希望予人「特賣場」之感。
Terence指，超市分店裝潢光猛，貨品亦必須排列整齊，不希望予人「特賣場」之感。

努力了接近8年，Terence見證港人對過期食品的概念轉變。以前在市集聽過有媽媽對小孩說：「唔好學呢啲哥哥姐姐，佢哋賣啲嘢會食死人」，到現在有些客人會自發為Green Price宣傳，「發現自己都為個社會做咗少少嘢」。Green Price原意集「環保」與「抵買」於一身，「其實啲客知唔知到期唔緊要，你入嚟買，覺得啲 quality 好、抵，就試第一次，再買可能就係因為環保呢個議題」。

【Green Price 分店地址】

https://www.facebook.com/greenpricehk

Terence希望Green Price以平價吸引大眾為環保出一分力。
Terence希望Green Price以平價吸引大眾為環保出一分力。