環球特工：無須經驗學歷 讀四個月課程即成驗樓師？

香港最發嘅行業，一定係同樓有關，近年樓市大旺，完全升到收唔到掣，仲話單位落成量每年以3萬起錶，面對咁多一手、二手賣買，其中一個行業應運而生，就係驗樓。講起驗樓大家都應該會諗起經常喺電視見到嘅大師詹濟南；不過原來唔講唔知，其實「驗樓師」並非一個專業牌照，未有任何監管，只要讀一個為期4個月嘅課程，已經可以開公司掛牌驗樓師出去幫客人驗樓！

無須相關經驗

好多人以為要讀建築、測量先可以做，其實無錯如果有相關學歷無疑係對驗樓有額外幫助，但其實坊間例如港專等學府都有提供4個月課程，當中學習驗樓知識及實習，無須有相關經驗或學歷都可以讀；修畢後有證書，可以加入香港「專業驗樓學會」。

收費逐呎計

驗樓收費雖然按唔同公司而定，當然行內有某啲係比較大名氣，就連發展商都會接納佢哋嘅專業報告；呢類驗樓收費起碼由1呎10蚊起錶，而且仲係驗一手新樓，驗問題多多嘅二手樓就更加貴啦。

要發牌有難度

概然講到無監管咁慘，點解驗樓師唔發起一個專業牌照制度呢？原來唔係咁容易，因為行內入面驗樓師基本就等如發展商同建築公司嘅敵人，如果要有專業制度就會牽涉到既得利益者嘅問題，所以一直都係未能確立專業資格。