直播靈接觸丨紅衣女鬼終現真身 彭翔翎為追夢兼職揸的士被封「最靚的士司機」

由梁思浩、黃紫恩（Jojo）及黃耀英主持嘅TVB Plus（82台）互動靈異資訊綜藝直播節目《直播靈接觸》造就唔少話題，節目內一位「紅衣女鬼」亦於每集不時加插動作增加氣氛，唔少觀眾都對其身份感好奇，有網民就估計係喺扮嘢真人騷《福祿壽訓練學院》擔任「扮工室助理」嘅陳懿德，但日前節目組終於揭開「紅衣女鬼」嘅真實身份，原來就係有「翻版林夏薇」之稱嘅彭翔翎。

過往於節目中，網民紛紛大讚女鬼表現夠晒專業認真，又會為佢抱不平，覺得佢咁辛苦但點解連片尾都無名。梁思浩於日前（22日）播出一集中，表示女鬼表現出色，所以畀彭翔翎還陽三日，接替放假嘅黃紫恩擔任主持，網民大讚彭翔翎靚女。彭翔翎15歲時曾經參加《Yes!》雜誌舉辦嘅校花校草選舉殺入四強，2018年投考第29期無綫電視藝員訓練班，之後正式加入TVB，入行已接近8年，曾參加綜藝節目《全城一叮》將魔術元素注入「野人故事」，出演《愛．回家之開心速遞》美女侍應、《雙生陌生人》有輕度自閉症嘅農莊員工「隋小冪」、及《踩過界II》飾演輕度智障角色「程可欣」等等。

彭翔翎接受TVB專訪時表示喺TVB工作唔會知道幾時有通告，所以喺外面搵工會比較困難，又無咩工作可以接受到突然要請假，所以的起心肝搵份可行嘅工作去兼顧，加上自己鍾意駕駛，於是考的士牌，兼職做的士司機，笑指自己好勤力，最高鋒試過一日收入高達2千元，亦被封「最靚的士司機」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！