直播靈接觸｜樊亦敏講朋友險墮性交轉運陷阱 作惡師傅下場極慘「走得好辛苦」

由梁思浩主持嘅TVB PLUS節目《直播靈接觸》，尋晚搵到信奉道教嘅樊亦敏(Amy)做嘉賓，分享因果報應嘅見聞。最爆之處係Amy講咗朋友險墮性交轉運陷阱嘅經歷。

Amy透露有位女性朋友新婚後懷孕但不幸流產，因為情緒低落於是有朋友介紹師傅俾女事主。呢位師傅話樊亦敏嘅朋友前世做過一啲事，令佢唔夠正能量，所以同子女無緣，師傅建議對方搵佢作法。

樊亦敏話佢朋友單人匹馬上去搵師傅，師傅開始露出真面目，話佢朋友「生得幾靚」，應該可以再懷孕，但要搵高人作法。樊亦敏分析嗰位師傅好識捉心理，同佢朋友講「你嘅小朋友唔會怪你」並叫佢懺悔，後來就話樊亦敏嘅朋友「身體太多陰氣」要驅走，而師傅有正能量可以注入陽氣，仲叫女事主唔使驚。樊亦敏指朋友心知不妙，但又一時間拎唔到電話求救，好在事主老公有跟住，發現打唔到電話搵老婆於是不停敲門，樊亦敏嘅朋友先至幸免於難。

樊亦敏得知有幾個人被介紹去搵師傅，而呢位師傅「做咗不同嘅嘢」。但Amy透露呢位立心不良嘅「師傅」後來身患多種疾病，想用唔同方法自救，但因為做壞事「破法」，結果走得好辛苦，臨終前只能喺病榻上輾轉反側。

性交轉運之外，樊亦敏仲講多個「現世報」故事。Amy話有次食飯有長輩叫佢地唔好浪費食物，亦唔好做釣魚等殘殺生命之事。長輩提到Amy另一位來自外地嘅長輩Uncle A，生得好高大靚仔又事業有成，但有日打牌時被朋友覺得佢面色暗灰。Uncle A話嗰排身體好痕，出現有啲一撻撻黑色嘢，而且瞓唔到，成個人開始消瘦，睇完醫生亦搵唔到原因。樊亦敏指Uncle A後來皮膚出現潰爛、有水泡甚至流膿，而且指甲會成塊甩出嚟。Uncle A於是搵師傅求助，師傅就話Uncle A年輕時喺外地做過對動物唔好的事。樊亦敏話Uncle A來自落後地方，除咗釣魚同捕獵動物食用之外，仲試過殘害動物。

師傅話睇到Uncle A身後有好多唔同形狀嘅靈魂，部份甚至成咗妖，而且Uncle A上世都做過害人同不道德之事，只係因為做善事先至令佢相貌端正而家人無離棄。Amy表示師傅叫Uncle A要懺悔，搵返前生傷害過嘅人求原諒，但Uncle A病情太重要坐輪椅，於是委派太太去佢家鄉。而Uncle A嗰條村居然有師傅有辦法搵返一個人轉生後叫咩名，Uncle A太太去向幾位「債主」和解並得到部份人原諒，而Uncle A亦一度行得返。但樊亦敏話同時有部份人原諒唔到，因為因果難解Uncle A病情亦未見好轉，離世前勸告身邊人唔好殘害生靈。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！