【真係講唔停】轉揸Tesla有幾著數？

「正苦」連續兩個月發表施政報告同財政預算案，今年好彩冇向駕駛者開刀，大家最擔心嘅汽車首次登記稅同牌費都維持不變，雖然話出年「牛肉乾」會加到$480，但都算係不幸中之大幸喇。

話就話今年乜都唔加，但個市咁鬼靜經濟又唔樂觀，睇個勢連人工都唔會加，所以都係要諗下辦法減低揸車成本。其實無論施政報告定預算案，都仍然鼓勵緊人轉揸電動車，例如話會加多啲公共充電設施，電動車又繼續免稅，再加上好多街外嘅叉電位係免費，就咁睇真係好似換得過。

香港每兩架電動車就有一架係Tesla，品牌個勢好強仲啱啱拍咗條好有本土味嘅宣傳片添。

提起電動車，好多人都會諗起Tesla，甚至有blogger話一講Tesla就唔停得口。事實上又真係幾有話題性嘅，例如Tesla老闆Elon Musk早排嚟過香港，首次透露一��不曾說的秘密：究竟佢哋喺香港至今賣咗幾多架車？呢個數字一直無官方資料，而今次據啊老闆講，原來有成二千幾架，再對一對政府數字，全香港而家有四千幾架電動車，即係話，每兩架就有一架係Tesla，都真係幾犀利。而且Tesla都講明會有新車陸續推出，例如七人車Model X同入門版Model 3，你話如果到時仲係免稅，一架Model 3賣30萬，唔駛入油又咁鬼好力，都咪話唔吸引。

Tesla嘅公共叉電站提供「快叉」服務，而且暫時仲係免費嘅。

講呢啲就太遙遠喇，因為呢一刻Model 3連訂都未開始收，如果要早買早享受，都係諗番Model S先啦。其實自從舊年年尾起真係多咗人訂Model S，因為Tesla推出咗個保證回收計劃，簡單嚟講係你買架車，供三年之後廠同你75折回收，條數有得預自然吸引人換車，所以啲sales交車都交到手軟。

Model S跟車都有叉電器，不過有幾多人可以裝喺自己個車位？

不過，電動車係咪人人都可以換呢？第一件要考慮嘅事，係你嘅居住環境同揸車習慣。如果你住村屋或者「喉屎」，隨手都搵到插蘇叉電，咁就唔駛我講都已經買咗電動車啦。但係絕大部分人都係住大廈，而且車位只係月租，業主得鬼閒為咗你一個客去裝個叉電器，所以好多人一得閒就揸架電動車去公共叉電位補給，以Tesla為例，九龍灣郵輪碼頭嗰幾個快叉位就經常排晒隊，而大部分商場都有提供中速叉電設施；不過遇著啲冇公德心嘅車主咁大鑊，例如架車唔係電動又泊入叉電位，仲要鬼咁耐先返嚟揸走；或者啲人叉滿電又唔走生人霸死地，咁就最乞人憎。

下一架Model X係七人車，鷗翼設計唔知會唔會頂到天花板？

好彩嘅係，Model S嘅電池容量都幾大，就算係最基本嘅70D，每叉滿一次都可以行差唔多300公里，而架車套brake又有動能回收設計，即係煞車或者放開「油門」（或者應該叫「電門」）溜落斜路都會重新叉電，所以好多人只係去叉一次電，都已經夠用成個禮拜。不過，如果你揸嘅係BMW i3條數又唔係咁計喎，因為i3嘅繼航距離唔及Model S遠，有車主話每次叉滿都係行唔夠100公里，所以每次出街都要諗定中途去邊度叉電，每晚返歸又一定要插住電掣。

BMW i3嘅續航力就冇Model S咁長，所以要計劃下路程，中途叉電。

EV Power嘅叉電器好多地方都有，而佢哋亦有承包大型屋苑嘅安裝服務。

睇到呢度你會問：「咁麻煩，係咪即係住大廈就唔駛諗換電動車？」又未必，因為隨住電動車開始流行，市面上已經出現一啲承包鋪設電網同安裝叉電器嘅公司，其中一間EV Power早排就幫大埔一個大型屋苑停車場裝叉電器，仲負責埋同車位業主、立案法團、管理公司甚至電力公司、機電工程署等部門溝通，總之你個屋苑一通過話可以裝，交俾佢哋就會一條龍搞好晒。不過，每位用家就盛惠$5,000安裝費同$4,500按金，仲要join月費plan俾錢叉電，收費按叉電速度同時數計算，最平$980，最貴$1,780。唔好處當然係要俾錢啦，因為而家出街叉電係免費嘅，不過好處就係肯定架車每日都有電，唔駛下下就住揸或出去排隊，如果住得遠而又要日日用車，都唔係冇得諗嘅，至少點都平過入油。但係以現時情況嚟睇，電動車數量唔算多，公共叉電都未算好擠擁，我估大部分人都寧願出去排下隊，都唔會自己裝叉電器。