【移民英國】2020全國最宜居區域排名 口音、族種、天氣詳述

近月「移民英國」成為熱門話題，一時之間大家身邊總有朋友家人話想移民英國。本身有親戚朋友喺英國就話有照應，不過相信大部分人喺英國可能都係無親無故，想移民根本無從入手。今日就首先教大家揀啱心水地區，英國保險投資公司Halifax每年都會根據英國各大區域嘅犯罪率、就業率、樓價、財富、居民快樂指數等26個範疇，選出最宜居區域，今年上榜嘅25個地區之中，第一位就係東赫德福（East Hertfordshire）。

倫敦後花園最宜居？

東赫德福位於「赫德福郡」，位處英國東部，連接倫敦北面，距離倫敦最北部僅30公里，與倫敦市中心約1.5小時車程，又被稱為「倫敦後花園」。赫德福郡分有10個行政區（東赫德福為其中之一）；人口約114萬人，白人佔近94%；今次調查之中，東赫德福「居民健康度」、「教育優質度」、「生活快樂度」三個範疇都拎極高分。東赫德福係英國傳統文化區域，既有寧靜田園風光，又有繁華市區，生活極為平衡；唔少倫敦人都覺得赫德福既擁有倫敦嘅生活質素，但又比倫敦享有較平嘅物價。另一大大加分就係教育優質度，其地理位置毗鄰多間著名學府，包括東北部與劍橋相鄰、東部連接埃塞克斯、南部則為倫敦、西部連接白金漢郡、西北連接貝德福郡，呢啲地區都擁有多所優質學校，及大量私立及公立名校，好多都被英國教育局評為「優秀」及「良好」。

不同地區各有優點

除咗第一位嘅東赫德福之外，榜上有名嘅各大地區於唔同條件之中亦各有優勢。「居民快樂度」之中，以西北部里布林河谷（Ribble Valley）居民最快樂，高達8.3分（10分為滿分），高過英國平均分7.6分。「治安」方面，則以蘇格蘭地區之中嘅奧克尼群島（Orkney） 最佳，10,000之中僅有3.2人曾經遇上罪案，同時該地區亦於「就業度」中稱冠。「居民健康度」方面，東南部赫德（Hart）就稱冠，取得極高分97.4分！「生活滿意度」就係西北部法爾德（Fylde）居民最好，有8.5分（10分為滿分）。「居住空間」之中以愛爾蘭北部費馬納與奧馬（ Fermanagh & Omagh）最高分，其居住空間最大。

移民去邊好？天氣、口音、種族都要考慮

以上睇嘅排名坦白講一定係以英國人作為主觀角度，雖然都有好大參考價值，但未必完完全全適合移民嘅朋友睇；因為移民最重要係講「適應」，好多因素係英國人移居未必會刻意去考慮，因為佢哋早已適應；但對於非英國人移民時就係好大嘅因素，包括係「天氣、口音、種族」。天氣方面，大家都知英國經常落雨，對於香港人而言，一開始居住一定會唔習慣，甚至有唔少移民英國嘅香港人話住到抑鬱。英國本島東南部天氣較好，一方面氣溫較和暖，另一方面陽光較充足；而北部則較凍，東面比較乾燥，但整體嚟講始終比香港更凍更濕。

口音：北部最好 威爾斯連英國人都聽唔明？

至於英文口音方面，英國唔同地區嘅英文口音都略有不同，對於香港人一直用開嘅英文嚟講，南英國嘅口音較易明，即大家熟悉嘅劍橋、牛津等地；而南部人講說話亦比較慢，因此就算大家英文程度未算非常好，日常溝通亦無問題。至於北部例如紐卡素、利物浦、約克郡等地口音比較重，而且不同區域嘅口音差異亦較大，對香港人嚟講可能難比較適應。英國本島以外，蘇格蘭英文出名難明，有一種獨特腔調，語音抑揚頓挫，充滿節奏感，對一般英國人而言會覺得蘇格蘭口音好性感好有味道，但對港人而言可以話要重新學習。愛爾蘭人講英文則又快又高音，一般英國人會覺得比較似「美式英語」，對港人而言則覺得好含糊，好似嘴入面含住嚿嘢一樣，要聽得明需要時間適應。威爾斯則完全跟英國有唔同口音，被英國人選為「最難明英文」，除咗發音有差異，當中擁有大量當地原住民「凱爾特人」俚語，例如常用嘅「小」（Little），威爾斯人會用Bach代替，香港人根本難以明白。有英國人則笑言去到威爾斯幾乎要問當地人「你懂英文嗎？」可見連英國人本身都難以適應。

邊區最多華人？

族種方面先旨聲明唔係鼓勵大家歧視，不過一個地區嘅族種人口，對於該地區嘅發展非常重要，亦關係到教育、治安、配套等，所以都要知清楚。英國有6,400萬人，有4成為非本土英國白人，全國3分1人都住於東南部，所以東南部亦比較多有錢人、白人等傳統英國人；西北部例如曼徹斯特、利物浦最多華人及香港人；英國第二大城市，中部嘅伯明翰多印度人。英國非洲裔黑人則95%居住於英國本島，單單倫敦已經超過100多萬。

總結：要親身視察

睇完一大輪，大家都可能略知大概，不過好多移民咗去英國嘅過來人都建議有心移民嘅朋友，一定要親身去視察先決定，唔可以只靠上網睇；因為好多時親身體驗比你上網睇一百篇文仲好。另外居住方面，揀啱城市又是否應該買樓呢？定還是租樓好呢？亦係一大學問，之後再用另一篇文章詳述吧。