細So婚外情被爆未夠一年 練美施由KOL變上市公司主席

轟動娛圈嘅前商台DJ細So（蘇耀宗）偷食事件舊年9月爆出之後，未夠一年2位當事人各有前路。據報細So事後得到太太Wing（陳詠楠）原諒，細So夫婦同埋2個仔冇幾耐就移居英國，今年4月細So一度喺IG蒲頭，post出疑似喺英國海邊嘅風景照。至於女主角「白滑KOL 阿B」練美施(Macy)唔止冇受影響，仲轉戰金融界！

早兩日上市公司米蘭站宣布，委任一位名叫練美施嘅女士成為公司執行董事及主席。公告入面提到，練美施而家係大型金融公司高級管理人員，有超過16年時尚及奢侈品零售經驗。印象中Macy 20出頭就開鋪賣衫，但係冇做過金融界。

奇就奇在根據公告，練美施嘅姓名寫法同年齡(36歲）都同細So舊愛Macy吻合，於是引來中環人討論究竟係咪同一個人。有報導就證實米蘭站新高層的確係Macy！原來Macy舊年成為新聞人物之後，獲得金融界高手邀請加盟證券行做CEO。

Macy今日就喺IG出post提到榮升上市公司主席呢件事，佢話「沒有任何驚天動地，追隨多年，要懂的都是該懂了，不懂的只因不認識。」、「人生，很公平，也很不公平，但時間運用，卻掌握於你手。沒有你們幻想的太多東西，如果有，一街都是上市公司主席了」，最後輕描淡寫咁話「我只是一個為生活打拼的平凡人，共勉之」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！