網民票選娛圈10大最靚仔混血兒 小鮮肉僅得Jeffrey魏浚笙入圍？原來佢都係混血兒 ......

混血兒比起一般人擁有更深䆳嘅輪廓，多為靚仔靚女，而娛樂圈不乏混血兒男星。日前，有網民於討論區以「嚴選娛樂圈中最靚仔的混血兒」為題出PO，結果竟然令人意想不到，10名最靚仔混血男星之中，大部分都40歲以上；而小鮮肉方面，僅得25歲Jeffrey魏浚笙榜上有名。一齊睇吓網民心中有邊10位最靚仔混血兒。

第10位：朱敏瀚（31歲）
朱敏瀚爸爸係香港人，媽媽係中英混血，所以佢擁有四分之一英國血統，細細個已經生得好精緻，曾經於TVB節目《童你一起長大了》分享指細個好多鄰居讚佢可愛，又會搣佢塊面；5歲參加TVB《仙履奇緣旅程大競賽》獲得「最英俊王子大獎」被模特兒公司睇中拍廣告及教育電視，而朱敏瀚於2010年入行，2011年因參演《點解阿Sir係阿Sir》，憑劇中「莫澤基」一角變得為人熟悉。

第9位：許志安（56歲）
許志安係一名中越混血兒，爸爸係香港人，媽媽係越南人。許志安1986年參加新秀歌唱比賽入行，並於1988年推出首張個人大碟，屹立樂壇三十多年，本身愛情事業兩得意，但2019年和黃心穎「安心偷食」事件令形象插水。不過，老婆鄭秀文選擇原諒，又支持佢重新出發，許志安於去年3月宣布加盟環球唱片。

第8位：宋本中（43歲）
宋本中係中法混血兒，於1999年電影《三五成群》飾演童黨首領「廿八座大王」阿俊令人印象深刻。不過2002年佢就轉型幕後工作，2017年大熱網劇《反黑》正正由佢擔任導演。

第7位：栢天男（41歲）
栢天男外型亮眼，加上身材高大，因此2011年從澳洲回流返港時已擔任模特兒，並有「翻版金城武」之稱。及後，栢天男轉型做演員，首部電影《L風暴》已拍住古天樂、鄭嘉穎及譚耀文做對手戲。栢天男曾經表示好多剛相識嘅人都會問佢係日本人定韓國人，又曾被誤會係印度人；而佢爸爸其實係蒙古人，媽媽係上海人。不過，有網民就質疑咁樣算唔算混血。

第6位：王敏德（58歲）
王敏德擁有中法及荷蘭混血血統，由於樣貌貴氣，多於電影中飾演外籍警官。王敏德與名模太太馬詩慧育有兩女一仔，細仔王躍穎（Kadin）擁有6呎身高及40吋胸肌，身形健碩，被指盡得父母真傳。

第5位：陳冠希（42歲）
陳冠希Edison擁有八分之一葡萄牙血統，年輕時嘅靚仔模樣加上潮流打扮可以話係打遍天下無敵手，鬼鬼地嘅高顏值樣迷倒眾多少女。不過，陳冠希早年被指狀態不復當年，臉上魚尾紋、鬚根、M字禿盡現，男神降級成中年大叔。

第4位：Jeffrey魏浚笙（25歲）
Jeffrey魏浚笙具有荷蘭和印尼血統，被指似足巔峰時期嘅陳冠希；Jeffrey本身擔任模特兒工作，與女友Evelyn於2020年參演ViuTV真人騷《調教你男友》而人氣急升，及後成為廣告新寵，吸金力驚人。之後，Jeffrey又加入遊戲真人騷《膠戰》成為「6膠」成員之一，而Jeffrey更加係一名痴情暖男，曾喺《調教你男友》中公開表示希望可以喺女友30歲前結婚。

第3位：尊龍（70歲）
尊龍於1987年電影《末代皇帝》溥儀一角走紅，更加入圍美國金球獎劇情組最佳男主角。不過，由於尊龍係孤兒，僅透過佢前妻Nina Savino透露指佢係中葡混血兒；尊龍更曾獲封「亞洲第一美男」及美國《People》雜誌選為「50全球最美的人」之一。早年，網上流傳尊龍參加宴會嘅近照，網民紛紛指佢變得蒼老，又有個大肚腩，已不復當年。

第2位：黃秋生（61歲）
黃秋生係中英混血兒，其本名係Anthony Perry。原來改名原因係因爸爸係英國人同時又係港英時代政府官員，但早於佢4歲時與黃秋生母親離婚，因此母親就用自己嘅姓氏，加上因為黃秋生秋天出生而改名。黃秋生曾於微博PO出童年和父母嘅全家福照片，被網民大讚激靚仔。

第1位：金城武（49歲）
金城武爸爸係沖繩人，媽媽係台灣人，15歲時因拍攝汽水廣告而入行，曾拍攝日劇《神啊！請多給我一點時間》、電影《重慶森林》、《墮落天使》等等，而拍攝《神啊！請多給我一點時間》時更被大讚靚過劇中拍檔深田恭子。金城武近年鮮有新作，2021年拍攝手機遊戲廣告「天堂2M」代言廣告令網民覺得即使多年未見，依然具有男神模樣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！