網民要求院線停播林二汶戲院禮儀歌 林作：本人願意出10萬元俾戲院

近日林二汶負面新聞不斷，繼7月1日出新歌《中華‧頌》惹網民批評及被忠實粉絲質疑誤信「邪教」後，有影片頻道幕後人Yuki指林二汶喺盧凱彤離世一個月時，周圍呃蝦條。去到噚日（6日），唔少網民紛紛到百老匯院線嘅社交平台洗版式要求換走林二汶有份唱嘅開場歌《戲院禮儀歌》，否則佢哋就會罷睇該院線。喺呢個時候，「抽水王」林作當然唔會錯過「出場」嘅機會啦！林作喺社交網站出PO話願意出10萬蚊俾戲院將開場歌換走，及俾90萬播佢嘅原聲激動錄音。

林作喺噚晚（6日）出PO：「本人願意出10萬元俾戲院，當俾個台階戲院落，收番埋呢首長年累月唔知林小姐俾咗幾多錢戲院keep住播嘅歌。超低B，侮辱觀眾智慧「唔准吸菸咗好耐啦」，你XX我會唔知？我入場睇高深外國劇情片，一開場黎段低B歌，搞到大煞風景。多年來我已經每次都遲到入場，有時都係難免要聽到。俾多90萬你，錄5秒林作原聲激動錄音：「熄電話啦PK！」，一樣播足咁多年，仲實際。」

此PO一出，唔少網民留言支持佢，例如「終於做返啲正常嘢」、「依個支持」、「你人生又做多一件好事！」、「如果係既，我會為左聽你果5秒買飛入埸睇」、「難得小弟今次撐你，正!尤其最後一段，想聽好耐。」、「第一次覺得你做返啲嘢係正常」及「撐你！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！