緣路山旮旯︳毒舌影評鬧樣衰 岑珈其得體回應「樣衰我改唔到」

暑假係電影旺季，呢期新片包括因為疫情而推遲半年上映嘅港片《緣路山旮旯》。唔少人都讚套戲有意思，蘇玉華更加形容「好似响盛夏飲咗一枝透心涼嘅礦泉水！爽！」。

不過亦有負評，有影評專頁就毫不留情狠批《緣路山旮旯》，以大量粗口兼毒舌言論鬧爆。作者以「後宮系」形容《緣》，大概意思係等觀眾對身為弱者嘅主角有代入感；又提到套戲「一堆靚／高過男主角太多嘅女角，佢哋任何稍為親密嘅感情戲都毫無說服力」。影評入面更點名批評男主角岑珈其外貌，更狠批「如果你入場，你會同我一樣，想跳入個SCREEN打x佢，想坐時光機欺凌佢，欺凌到佢大個唔敢做演員」。

唔少網友都認為作者太過主觀，又或者人身攻擊太過份，而岑珈其本尊亦有留言回應︰「多謝你嘅分享，我嘅樣衰令你難受，影響到你唔好意思，但我真係真係好鍾意做演員，就算你坐時光機返去我以前細個欺凌我，我都會想做演員。樣衰我改唔到，但我會努力再做好啲演出，希望將來可以得到你嘅支持」。珈其嘅留言得到超過7千個like或者心心，而版主都有回應，並就言論致歉，「但說得太過，還請見諒」。

其實原文評論都有提到套戲其他問題，例如對片中女角們居住嘅「山旮旯」地方描述流於表面，亦唔見得同劇情有幾大扣連。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！