美斯表演賽主辦單位 Tatler Asia主打奢華內容 賽前搞球星見面會入場費15萬

阿根廷球王美斯所屬球隊國際邁亞密星期日來港進行熱身賽，全場門票嘅票價由＄880至$4880不等，即使所費不菲但一早售罄，但更「㷫」嘅係主角美斯只係坐喺後備席，未有落場作賽，引起球迷不滿。特區政府發聲明表示極度失望，並批評國際邁亞密及是次活動主辦單位Tatler。而Tatler亦發聲明，同樣對美斯及另一球星蘇亞雷斯無參與賽事感到極度失望，又指賽前未獲通知二人不會落場。

主辦今次賽事嘅Tatler Asia，本身出版多本主打奢華生活嘅雜誌，亦經營同樣風格嘅網媒，並為國際品牌舉行活動，以及舉辦頒獎禮等，業務遍佈內地、東南亞等地區。擁有Tatler Asia嘅集團前身係一份1907年創立嘅瑞士報章，1937年時由Lamunière 及Payot 家族掌管，到1982年Lamunière 收購公司並改名為Edipresse。2005年Edipresse進軍亞洲市場，到2020年掌管集團亞洲嘅Edipresse Media Asia改名為Tatler Asia Group。

Tatler Asia甚少舉辦今次呢類體育活動，而據知Tatler Asia喺上周六，亦即球賽前一天舉行國際邁亞密球星見面會，入場費開價15萬元，可以同球星見面影相兼傾兩句，並且獲得球賽VIP門票。另外Tatler Asia仲搞咗個球星簽名會，都要12萬落樓。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！