老戲骨爆Seed非同小可 經典逐幕數

近排喺劇集《巨輪II》入面由吳岱融飾演嘅高天鷲非常搶眼，奸到出汗嘅演技引起一眾網民嘅關注，近日一場大鬧李佳芯飾演嘅鍾穎係臭雞一幕更加被廣傳。果然，老戲骨係有與眾不同嘅嘅吸引力，不如就睇下近年深入民心嘅有邊幾段戲：

1. 《巨輪II》－高天鷲大鬧臭雞一幕

吳岱融飾演嘅高天鷲一句「攞去洗啦，臭雞」，令呢場戲被網民熱烈討論。其實呢場戲，講緊李佳芯（Ali）飾演嘅鍾穎有咗高天鷲個仔高先柏（張致恆）嘅BB，但鍾穎同高天鷲有過一夜情，於是高天鷲就想用錢要佢離開佢個仔兼落仔啦。高天鷲由一開頭講要佢消失，再話Ali係雞，再一巴車埋佢度，然後霸氣咁拎成舊錢出嚟拋去Ali到，無論對白語氣、動作表情，吳岱融都做到完全貼合高天鷲呢個人物咁目空一切、手段狠辣嘅性格，老戲骨果然係老戲骨，氣場完全壓過Ali，唔怪得成為呢套劇嘅亮點啦。當然，如果大家有興趣，仲可以睇埋另一場強姦戲，吳岱融再次展現到高天鷲嘅佔有慾，當然仲有陳凱琳……

2.《造王者》－董昭先行告退一幕

鄭則士當年做弱智嘅肥貓非常出色，做到觀眾都忍唔住為肥貓流過唔少眼淚。老戲骨鄭則士不時會返TVB拍劇，而最令人印象深刻嘅莫過於佢喺《造王者》入面飾演董昭一角。當年除咗敖嘉年嘅「許許許許許」被人廣傳，其實仲有一場戲非常深入民心嘅，就係鄭則士受到苑瓊丹飾演嘅皇后猜疑而削減權力。於是鄭則士就由平靜咁講自己幾咁忠心為國，為自己辯護，但皇后依然無收回成命嘅意思並叫佢告退；之後鄭則士語速增加，並質問咁樣公平咩，不過就激到皇后再嚴厲叫佢退下。呢個時候，鄭則士為咗表達自己嘅不滿，於是提高八度大叫「微臣董昭先行告退」，真係當堂打個震，不忿之情完全表達到出嚟。

3. 《名媛望族》－鍾卓萬連摑13巴

當年睇《名媛望族》，大家最留意一定係啲重口味情慾場面啦係咪？好彩，王浩信硬食劉松仁13巴呢幕亦都引起唔少人留意，不過大家只係掛住講王浩信幾咁敬業，肯直接被人打。當然王浩信係一個前途無可限量嘅好演員，但係老戲骨劉松仁係呢場戲更加有不可或缺嘅作用。劉松仁由問係咪王浩信嘅平靜樣，到佢突然出手摑王浩信，仲要連摑13巴，並且越嚟越激，摑人都摑得有層次，睇得出佢作為一個父親，係幾咁嬲個仔做出咁嘅事。你咪以為摑人真係咁爽先得架，都要交足戲，令觀眾信服摑咁多下係有意思架，要做到個層次出嚟真係唔易架，私心都真係幾鍾意松哥做戲～

圖片來源：TVB.com、 Youtube.com