葡萄友：慎防親戚細路拜年 容易受傷4大物品

年初五，祝大家開工大吉！相信過去幾日大家都不外乎喺拜年之中度過，今年最多網民談論要數討論區有人話自己表弟每年上嚟拜年都會拎走佢屋企玩具，今年仲過份，竟然自己走入樓主間房，拎走PS4 Pro、VR、MacBook以及樓主儲錢袋，樓主憤而報警。事件尚未有最新Update，不過已經被一眾網友鬧爆，而且仲引起大家潛藏心底嘅不愉快回憶。其實新年親戚上屋企拜年本乃開心事，不過好多「慘劇」都因為小朋友嘅父母管教不嚴，甚至鼓勵小朋友去私自拎「玩具」，導致好多時候引起衝突，新年流流，又何苦呢？！一齊睇下以下「容易受傷的物品」啦。

模型玩具

好多人鍾情於玩具模型，但通常係非常脆弱，莫過話跌落地，有時甚至拎上手都會爛。好多時父母會覺得係普通膠公仔玩具，掉以輕心，然後你多年儲落嘅乜乜限定、物物紀念版就會「命喪」喺小朋友之手，變成一堆甩手甩腳嘅公仔。所以模型絕對係Number 1需要保護嘅物品。

電器

玩具都話可以收埋，但係電器總唔能夠掛？好多小朋友嚟咗之後，瘋狂玩弄電子產品，電影機、音響、遊戲機、電腦、平板電腦，通通都係受害者。有網友仲話親戚每次見到佢用iPad，就會叫佢「送部遊戲機畀小朋友」，完全無考慮過價錢；另外有人更話試過成部電話畀人掟咗落廁所！

寵物

除咗貴重物品，其實屋企仲有要守護嘅重要朋友，就係毛孩喇！唔少朋友話屋企嘅寵物試過遭受親戚小朋友嘅不仁對待，輕則夾硬抱起，重則拳打腳踢。你知啦，毛孩有時都唔係好恰，可能會反擊，到時任何一面受傷都唔好啦，所以記得，快手搵個安全地方安置毛孩喇。

樂器

好多時大型樂器，例如結他、鋼琴等等都會成為小朋友眼中嘅得意發聲玩具！小朋友對聲音特別敏感，因此一見到就會忍唔住拎上手彈幾嘢，或者瘋狂亂彈一通，平時愛惜樂器如命嘅你，都咪話唔心痛！而且樂器價值不菲，任何少少損壞已經可以令整件樂器報廢。