葡萄友：有片！兩少女對食物瘋狂影10分鐘都未肯放入口

自從社交媒體興起，影相打咭呃LIKE呢啲動作已經變成生活日常事，而一眾行為之中，又以「相機食先」最常見，任何美食或者靚景餐廳，當然未食就先影相，再Post畀姊妹睇下先啦！其實平時影一、兩張相絕對無問題，大家亦見怪不怪；不過好似近日外國網站就流傳一段片，當中影到兩位華人少女，喺Jamie Oliver餐廳之中對住自己面前嘅一碟食物瘋狂影相，而且時間持續成10分鐘！片中兩位少女幾乎用晒所用角度去影，低炒、高炒、側面、Topshot、轉Filter ，再轉埋對方碟嘢食，甚至其中一位走出餐廳外影入去，而將自己碟食物放置於地上！拍片者更忍唔住自言自語講咗句：「Just eat it.」事後影片下引起廣泛留言，好多人都表示難以理解，而且仲話根本唔尊重食物，令食物凍晒。相機食先，其實有好多社交上嘅問題，影還影，都唔好太過份嘛。（想睇片嘅朋友，請按這裡。）

食物變質
食物出到嚟放喺枱面，你仲要影三五七分鐘先開動，令熱力散去，味道已經走樣，尤其去到高級餐廳，大廚連食物由廚房送到客人枱上嘅時間都計好拿捏好，就係希望食客可以品嘗到食物最佳嘅狀態。如果瘋狂影相，唔尊重食物唔尊重大廚。

影響朋友
唔講其他人，就算同你一齊食飯嘅朋友，除非好似片兩位少女都一樣咁熱愛影食物相，否則就要等你度好影好先可以一齊食，有時一大班食飯仲一個唔小心未影相就夾咗，即時畀人鬧到飛起，唔好話畀我知你未試過呀。

忘記欣賞食物
自從開始相機食先，大家好似已經習慣咗菜一上枱，隻手已經拎住部電話去等，然後狂影一輪，再開始食，可能仲要係一路食一路用緊電話Upload緊上網，根本無再細心用眼用心留意過食物，連食物嘅味道都唔重視，最緊要係呃LIKE。