葡萄友：藝人唔易做 坤哥一年間從人氣王變過街老鼠

咁多個樂壇頒奬禮中，最受歡迎同最多人睇嘅始終都係叱咤，頒奬禮係元旦日結束，而今年亦都離唔開各種話題，好似容祖兒連續11年冧莊攞女歌手大奬、陳奕迅話唔出現又出現兼忘記歌詞，仲有嘅就係吳業坤攞我最喜愛男歌手奬，學林海峰話齋：「呢個樂壇真係響起警號啦！」今年只有一首派台歌嘅坤哥，拎完十大歌曲第五位後對於再次能夠拎到《我最喜愛男歌手》時都不禁呆滯、唔識反應，據講當時仲傳出喝倒彩嘅聲添，令到佢不知所措之餘亦非常尷尬。

不過人始終無辦法滿足所有人嘅想法，加上而家網民嘅諗法係無辦法捉摸，又話欣宜搬肥姐出嚟，又話Eason唔專業之類，惟有專心做好自己，總有人會睇得到。而家嘅歌手除咗唱歌之外，亦都有好多野需要擔心架。

人氣倒退
藝人或歌手最擔心嘅一定係人氣，因為觀眾嘅支持同多寡先至係佢價值，就算幾咁勤力同付出幾多，無人留意、欣賞同鍾意都係得個桔，所以佢地先要不斷咁有露面同出現係大眾面前嘅機會。

工作量不足
工作量同收入對佢地嚟講從來都係直接掛鈎，而且當工作量多嘅時候間接代表咗曝光率同知名度會提高。所似例如坤哥今年得《百姓》一首歌派台，擔心自己名不符實亦都相當正常。

競爭對手
對手有幾利害亦都唔能夠忽略，男歌手嚟講Eason根本係無得鬥而且對方已經唔再志在奬項。但今年佢對手陳栢宇年尾時呼聲好高，加上佢喺樂壇已經耕耘成10年，好多人都希望佢得奬。結果唔係嘅時候，難免會有好多聲音出現啦。

網上講錯嘢
而家個個歌手都有自己嘅社交平台，每每社會有咩事大事發生，唔講嘢又話對社會漠不關心，一講嘢重衰，十居其九都會講錯嘢。所謂一失足成千古恨，講咗一句，比人罵爆之餘，仲Cap埋圖講足10年8年，人氣絕對大不如前。

相片來源：Ng Yip Kwan , 鄭欣宜 Joyce Cheng, Eason Chan＠facebook