葡萄友：呢個時勢仲叫人買樓 唔係賤格就係有病

樓市癲，日前公布嘅本地樓價指數，創出歷史新高，換言之，目前係香港有史以嚟最高嘅時間。樓價已經上升到正常人負擔不能嘅地步，種種調查都顯示香港樓價為全球之冠，更要不吃不喝19年先買得到一個400呎單位。面對如此瘋狂嘅樓價，正常有腦嘅人都會叫人唔好買住；但竟然仲不時有啲所謂「專業人士」發放新聞，什麼「樓市準備小陽春」、「自住唔怕買」、「最怕買得遲」，加上大台節目晚晚散布叫人快啲買樓嘅訊息，甚至話人「唔買樓仆街蠢」等，製造氣氛，仿似宜家唔入市就會蝕底一樣。呢度唔係財經專欄，唔會分析樓市走向或者前景，只同大家講一講呢個時勢，點解仲要有咁多人呼籲大家快啲買樓上車，究竟咩居心？

炒家

泡沫從來都係咁形成，以炒消息繼而「乾升」，接近零利好原因，再加上加息等壞消息下，其實樓價應當下降，但如果一跌，之前高位接火棒嘅人點算，咪惟有繼續製造大氣氛，令人產生一個樓市永遠只升不跌嘅假象。

地產商

作為發產商，當然唔想樓價跌，所以自然不停出招務求令樓市唔跌，包括自己借錢畀業主買新樓、分批啫牙膏式賣樓等；目標係唔會形式有樓無人賣嘅情況，為咗製造搶樓嘅熾熱氣氛，好多時更會以假客身份入市，抬高樓價。

經紀

至於經紀，喺人人都驚到唔敢買之時，佢哋豈不是無生意，所以什何壞消息例如加息都會演譯為好消息吸引買家，加息令供樓成本增，而且今年有機會加成3次息，但經紀反而指話「息口勢走穩，入市信心增」，當白事為紅事咁做。