葡萄友：女朋友住新界西 係你嘅福氣

近日有一篇網絡潮文談及住喺新界西嘅朋友全部都係最堅毅嘅香港人， 理由係住得比平常遠，無論返工或者消遣娛樂都要忍受比市區多一、兩個鐘嘅車程；潮文之後獲廣傳更被拍成短片，一片大熱，一時之間大家都談論住新界西有幾唔方便。其實住新界西，係泛指屯門、元朗、天水圍；荃灣、青衣、葵芳其實已經屬於「市區」，咁住「屯元天」除咗交通不便之外，仲有咩苦處？有網民就話自己女朋友由出世至今都係住呢個「大西北」，自己亦不時深入該區，的確無論從生活習慣、人口比例幾方面都非常唔同，因而連女仔都練就出一身「銅皮鐵骨」，仲話 「識揀女朋友一定係去新界西揀，係港女嘅機會都細好多！」點解？即睇！

婚後住邊無所謂
有網民話女友原本住港島，但二人計過數，結婚之後只負擔得起買屯門樓，諗住上車先筫，但遭女友極力阻止，完全無情講；相反如果女友一直住喺屯元天的話就完全無問題，如果負擔得起市區當然錫晒你，就算婚後要住返屯元天，一樣無問題，係另類嘅「贏在起跑線」。

去邊都唔嫌遠
由 細到大出入大西北，已經練就一身別世不同嘅時間觀，一個鐘嘅車程對於呢班女仔嚟講完全不當一回事；作為男朋友，有時想同女朋友去下嘅偏遠地區行山、遠足、 尋幽探秘，幾遠車程女朋友一樣OK無問題，莫講話埋怨，甚至會反過嚟安慰番你呀！仲有，佢哋永遠有方法打發呢程車嘅時間，根本連娛樂佢哋都唔使。

收埋一堆秘景
早 排好興行嘅菠蘿山，好多市區人可能都聞所未聞，想跟風去呀？上網搵資料啦，但呢個時候，如果你有一位屯門長大嘅女朋友，佢就會簡單直接一句：「下！細細個 已經去到唔去啦。」然後不慌不忙帶你上山。大西北地大物博，真係仲有大把秘景，男朋友大可交晒畀女友，可以慳番唔少時間策劃周末行程呀！

有耐性 抗壓能力高
你叫好日唔入大西北嘅市區人試下去屯元天，保證一定粗口橫飛，先唔講來回成3個鐘嘅漫長車程，仲要無位坐逼住企，入到去大西北以為真係人少過市區咩？君不見元朗、屯門長期人滿為患，無論商場定係街都塞滿人，仲要大部分係國內同胞。日日住喺入面，耐性同抗壓力點會唔高先？