葡萄友：布都無塊公然露乳餵BB：「你批評我就係歧視我」

公眾場合餵哺母乳又掀起新一股話題，大家記性好嘅話應該記得去年官恩娜因為喺酒店更衣室餵母乳，被其他中年女士侮辱，令網上引起討論熱潮，究竟公眾場所餵母乳嘅問題；估唔到一踏入2017年又到台灣發生問題，就係林辰唏喺高鐵中餵哺母乳（如上圖所見），而且拍照放上個人網站。事後遭到大批網民留言，認為林辰唏有礙風化，雖然餵哺母乳係自由，但都應該以布遮蓋，以免其他乘客尷尬。其後林辰唏就直接話「很自然健康不是嗎？」又隨即被網友反問「如果有其他大叔、街友圍著你看，那也很自然吧，畢竟是你自己愛這麼做。」最後林辰唏更講咗一句：「我沒有什麼可感到可恥的。」唔知幾時開始，大家好似已經唔可以將「羞恥」掛喺口邊，因為做咩，都唔應該覺得可恥喇。

餵哺母乳

就好似林辰唏咁，公然喺高鐵上赤裸上身餵BB，無錯，餵哺母乳確實係自然行為，但難道你就唔可以用一塊布遮掩一下嗎？畢竟你覺得自然，但其他男士會非常尷尬，對眼究竟要望邊先唔會被人懷疑？留意，呢個並唔係歧視，只係任何人赤裸上身喺公眾場合，同係同一樣令人尷尬。

同性親熱行為

曾經有網民話喺街上突然見到兩名大漢濕吻，佢就自然地發出一下「喔」然後擰歪面，但之後竟然被兩名大漢喝斥佢係「恐同」；其實並非係要歧視同性戀，但突如其來喺街上見到一對戀人濕吻，不論性別，都會好自然會擰轉面。想做親密行為又唔畀人「啋」嘅話，請唔好喺公眾場合，勿以「同志」作擋箭牌。

唔可以話人「肥」

高矮肥瘦係每人自己心入面把尺，不過唔知幾時開始香港已經唔可以指人「肥」，尤其香港某位女歌手，任何對佢嘅批評，最後都會被歸咎於「自己肥」。對於一個表演者，外型其實非常重要，咁多藝人每日如此辛苦刻制去減肥，都係因為唔想「肥」，但我地就連一句話覺得某某人好肥都唔可以講出口呢。