葡萄友：求婚係男人最大課題 4大必要預備同考慮嘅因素

農曆新年都差唔多完，不過各大商場依然仲有唔少活動。尋日蕭正楠係出席活動嘅時候，就話好彩農曆新年有假放，可以同翠如BB一齊過之餘仲去咗佢屋企拜年添。期間被問到有無被人催婚，雖然佢就話無，但曾經有表示過會係2017年結婚，仲話覺得如果係情人節求婚會覺得係一件好浪漫嘅事黎添。睇嚟佢都有認真考慮過係時候成家立室咁喎。

而家多咗人崇尚簡約主義，有人會覺得求婚只係一個姿態，簡簡單單其實已經好足夠。不過，有時功夫同心思就真係唔慳得，始終求婚果段回憶都係畢生難忘，咁你會點樣預備呢？

特別日子
求婚之前當然係要揀番個特別又難忘嘅日子啦，除咗節日之外仲有例如係對方嘅第一次約會或者kiss嘅日子，又或者係對方嘅生日。夠特別之餘仲可以記少多個日子添。

指定地方
除咗時間外，地方當然都好緊要啦，可以係大家經常去又或者好鐘意嘅地方。甚至係外國某啲令人好憧憬又夠浪漫嘅地方好似係巴黎鐵塔、希臘聖托里尼等等，隨時男仔踎低縛鞋帶都以為係想求婚呀。

道具
除咗最重要嘅戒指之外，仲有唔少道具可以加強個氣氛例如係氣球、花、蠟燭⋯⋯如果有養寵物嘅話，可以搵埋狗狗添喎。

朋友幫手
呢個時候就最靠朋友幫手啦，例如可以搵對方朋友「扮偶遇」約定係某個地方、到時又可以幫手拍片留念，但最重要係有最好嘅朋友一齊係到見證，將呢份重要嘅喜悅同佢身邊重要嘅人一齊分享，好有意義。

相片來源：edwinsiu @instagram