葡萄友：萬六人參加渣馬 似趁墟多過比堅跑

一年一度嘅渣打馬拉松尋日就跑完，除咗本地跑手同長跑愛好者之外，仲吸引到唔少來自外國嘅跑手專程嚟參加，合共超過16,000人。相比起舊年落起雨，今年嘅天氣好得嚟又乾爽，非常適合跑步。不過似乎每年嘅馬拉松入面都有跑手身體不適而要送院，今年就有總共27人需要送入醫院，其中2人嚴重並且有1人危殆，佢係第一次跑十公里嘅52歲女跑手，據指因為心臟不適至今仍然係深切治療部留醫。其實跑步係健康嘅運動亦都好多人想參加呢個盛事，但經常都忽略咗好重要嘅事。

充份練習

長跑係一項需要恒常練習嘅運動，絕對唔能夠突然間單靠一、兩個星期嘅練習就得。加上有唔少人都係因為湊熱鬧或陪朋友而去參加，而且又諗住十公里好易應付，結果就估計錯誤。

良好嘅裝備

跑步都要有好嘅裝備，衫褲除了啱身同夠通爽散熱之外，最重要係一對適合嘅跑鞋，仲要係比賽前著住佢練習，適應個跑步落地嘅感覺。

預備功夫

除咗係跑之前做足熱身同拉筋之外，仲要留意番天氣嘅變化。因為渣馬都係清晨開始氣溫較低，後來氣溫會上升加上運動會令身體承受幾大嘅溫差變化，增加頭暈同容易誘發心臟病嘅機會。

注意其他選手

有唔少跑手都做咗好多特別嘅裝扮，有時可能會令人分心或者會擋住視線構成危險，而且仲要小心賽道上掛住自拍嘅人，阻塞住賽道而影響到其他人。

相片來源：香港業餘田徑總會＠facebook