葡萄友：香港今年或立法禁止師生戀？

「師生戀」從來都係社會禁忌，不能說的秘密，嚴重嘅情況之下，有機會連份工都無埋（當然仲有機會衰十一啦！）可能有見去年發生眾多單師生戀事件，「教育人員操守協會」就提議，將師生戀全面立法禁止！目前無明文規定師生戀會違反刑事法，比起社工、醫生等要寬鬆得多，今次建議嘅內容就明確指出「應避免與學生發展不恰當的師生關係」，當中有6點明確指引，有幾明確而有幾多灰色地帶呢？一齊睇下啦：

避免與學生建立不當親密關係
師生關係其實應該要係親密嘅，自古以來無論係教書嘅師生或者手藝嘅師徒，大家關係都一定要係彼此親近而且信任，協會呢一個守則，無明顯講明何謂之「不當」，似乎有再闡釋嘅空間。

不得與學生發生性關係
呢條比第一條清晰簡單而明好多啦！不過就算「性」就有好多種，佢又講緊程度有幾深呢？

避免跟學使用親暱用詞
呢樣仲見仁見智，因為親暱可以係表示親切嘅一種，不過呢如果你用到「BB豬」、「Honey」咁叫學生，就抵死啦；但如果叫同學英文名又算唔算？花名又點計？

無合理原因不可接觸學生身體
呢條應該係出於阻嚇作用居多，等為人師表嘅唔好手多多，當然喇，你話如果見到學生就嚟仆低就無理由仲要諗扶唔扶佢啦。

不應與學生私人約會
呢一點就非常清晰喇，相信現今都唔會有《逃學威龍》入面女Miss自動要求幫男學生私人補習嘅需要啦，但如果校隊老師不時會用個人時間幫隊員加操，又點計？

不得對學生作出任何途徑的性騷擾
其實呢呢條都幾多餘，就算唔係學生，都唔應該性騷擾任何人啦係嘛？