葡萄友：魯芬因病離世 粗獷外表下懷著嘅係一顆善心

原名為張偉芬嘅知名藝人魯芬，於今日凌晨因皮肌炎引致肺衰竭而離世。魯芬自1988年喺《女子監獄》飾演山東婆，自此深入民心，拍戲一套接一套，而且角色亦係大大份嘅惡霸，總之要聲夾惡，例如周星馳多套電影中嘅惡婆娘，當中當然要數到《九品芝麻官》嘅烈火奶奶、《整蠱專家》中嘅大白鯊等等。雖然戲入面做親都係窮兇極惡嘅角色，不過原來真正嘅魯芬非常不拘小節，大情大性，為人講義氣而且對人心存感激。近年咁興講女漢子，其實我哋嘅魯芬BB先係第一代女漢子呀。

好玩得
「魯芬BB」呢個稱號喺早年啱啱興講「BB」時，網上討論區搞到個投票，選出「女神排名」，而有網民就惡搞，放埋魯芬上榜，仲為佢拉票，最位更成功奪得第8位，訪問中佢就講過話唔介意人地惡搞，仲好好笑咁話「陳法拉都係贏我少少咋！」

敬業樂業
作為專業演員，魯芬雖然未能上到主角之位，但每一個演出機會魯芬都非常重視，因此每次出場雖然短暫，但已經令觀眾留下深刻印象。有訪問中提及有人搵佢上大陸登台，但場地非常惡劣，魯芬不但無嫌棄，仲好多謝：「人哋搵我，係人地識貨，多謝都嚟唔切啦。」

講義氣還人情
魯芬事業嘅第二春可以話係2012年得到「BB」呢個戲稱後，Job接Job，戲接戲，工作量大增。不過，原來魯芬好多時都係捱義氣，唔收錢，有時為嘅係以前欠下嘅人情債，有時則係為公益為慈善，唔收錢仲要倒貼錢都試過。

唔介意蝕底
女漢子又會少得呢樣，承上面一點，魯芬做慈善活動不遺餘力，好多時更係低調行善，無人知無媒體報道，亦有好多人利用佢嘅善心，有時半呃半氹咁搵佢登台，魯芬絕對唔笨，不過卻非常大量，絕不計較，寧願自己蝕底，都堅信對方係真心需要佢幫助。