葵廣2024最HIT美食！櫻花蝦濃湯粉絲、麻糬牛角包窩夫

又到咗葵廣美食介紹時間，一齊睇吓2024年葵廣最受歡迎嘅美食係咩啦～

櫻花蝦濃湯粉絲 宇治初時@自家創作料理

呢間小店一向都有唔少創意料理，但最受歡迎一定係濃湯粉絲系列。招牌菜之一嘅櫻花蝦濃湯粉絲，湯底濃郁，帶櫻花蝦嘅香味，有少少似叻沙，但多咗份鮮味，配上索湯嘅粉絲簡直係味蕾爆發！內含3隻已經剝咗殼嘅蝦，啱晒掃街呀～仲有佢哋嘅鯛魚濃湯粉絲，用新鮮鯛魚熬製嘅湯底，清新鮮甜，另外記得要加自家製宇治醬，又增添一份層次感。

麻糬牛角包窩夫+鯛魚燒 絆 1/2 Sweet

鍾意甜品嘅一定要試吓呢間主打麻糬牛角包窩夫同酥皮鯛魚燒嘅小店。麻糬牛角包窩夫外脆內軟，滿滿牛油香，內含煙韌麻糬，仲有多款口味畀大家揀，如Tiramisu、烤芝士布甸、焙茶脆脆同鹹蛋肉鬆等，口感層次豐富。至於酥皮鯛魚燒外皮酥脆，內餡一樣有好多選擇，如炙燒奶黃、花生奶醬等，前者奶黃味超香濃，但唔會太甜。

開心果香蕉煎餅 蕉積妹

主打泰式香蕉煎餅嘅小食店，開心果香蕉煎餅係即叫即整，而香脆餅皮內係新鮮嘅香蕉，上面再灑上滿滿嘅開心果醬同開心果碎，開心果味超足，果仁嘅香氣加上香蕉嘅自然甜味真係完美配搭～另有全港首創嘅法式焦糖香蕉煎餅，焦糖令成個煎餅脆上加脆，食落香甜濃郁，同朋友share食就最啱！

韓式拉絲芝士餅 10分麵包

由韓國興到嚟香港嘅10分麵包，專門提供韓式拉絲芝士餅！呢款芝士餅嘅外觀好有趣，設計成香港一毫子硬幣造型，餅皮外脆內軟，裡面包裹大量芝士，經過熱烘後可以拉出超長嘅芝士絲，既好玩又好味，啱晒大家相機食先。味道甜中帶鹹，有濃濃嘅芝士味，芝士控必食呀～而家仲推埋新口味Pizza同煙肉洋蔥，好惹味！

Gelato+香脆Churros Bunny Churros

葵廣必食嘅Churros專門店～除咗主打Churros仲有Gelato，提供唔同醬料畀你可自由配搭。Churros即叫即炸，每日人手新鮮製作，炸至金黃香脆同時有軟心效果，一啲都唔油膩，外層沾上滿滿嘅肉桂砂糖，就咁已經好好食。沾醬則有6款，包括最受歡迎嘅黑朱古力醬同海鹽焦糖醬，令甜味更豐富。你亦可以加Gelato，推介意大利開心果味，堅果味好濃厚，開心果fans一定鍾意。

文：Yanica
編：Cathy