雅虎香港新聞 野餐攻略丨新手野餐10大注意事項清單！有咩必備物品？唔可以帶邊種食物？野餐服裝/選址有技巧
天氣涼涼的，配合好陽光，最適合約齊朋友或帶小朋友到公園野餐，呼吸新鮮空氣，親親大自然！相信大家已經拎出鋪滿塵的野餐籃，又或入手全新的野餐裝備，準備迎接野餐旺季。今次就列出新手野餐10大注意事項，等野餐新手都可以好好作出準備吧！
👉🏼香港行山好去處專頁：發掘更多人氣/隱世/靚景/新手行山路線！
1. 揀防水兼有厚度的野餐墊
揀野餐墊千萬唔好一味貪靚，第一要挑選防水款式，一來避免草地濕氣，二來防止倒瀉飲品；第二要揀有厚度的，太薄的話只會「銀」住屁股坐得唔舒服；第三就係大細，從野餐墊長及寬，對照身高就大約可以測量出能容納多少人數。
2. 帶齊防曬、防蚊用品
野餐地點大多在公園或郊外，蚊蟲問題絕對少不免，所以記得帶定防蚊用品，隨時補噴；女士們唔想曬黑，就要帶齊防曬三寶：防曬油、日傘、帽，有需要帶埋風扇仔，以免邊玩邊乾煎！
3. 野餐籃有保冷功能
美觀的野餐籃當然可以增加儀式感，但因為要保持食物溫度以防變壞，最好選有保冷或保溫功能的野餐籃，如果堅持要揀藤製野餐籃，最好先將食物放入保冷或保溫袋之中，需要時更可加入保冷劑，才放入野餐籃內。
4. 自備垃圾膠袋
野餐少不免製造大量垃圾，記得自備垃圾膠袋，將垃圾妥善裝好，掉到垃圾桶。如身處郊外就最好將垃圾帶到市區垃圾桶，以防野生動物摷垃圾桶覓食造成衛生及污染問題。
5. 帶備大裝紙巾+濕紙巾
清潔用品往往是大家最易忽視的! 野餐要接觸食物，無論是抹手還是清潔，往往需要使用大量紙巾或濕紙巾，建議帶備盒裝或卷裝紙巾，以及大包濕紙巾，用量定必比大家想像中多。
6. 忌海鮮及奶製品
話晒食物只能靠保冷或保溫袋保持溫度，因此要選易於攜帶兼不易變壞的食物，忌帶容易變質的海鮮及奶製品，宜帶三文治、Pizza、沙律、水果、Bagel等容易分享的食物。
7. 棄用棄用即棄性餐具
為了環保或打卡都好，建議大家棄用即棄性的紙杯紙碟，選用美美的餐具，既減少垃圾，亦可以影出唯美照片。
8. 自備娛樂節目
一班朋友唔知玩咩好，可以帶球類或桌遊，兩口子可以睇睇書，好好享受悠閒的下午！
9. 舒適服裝為主
服裝要以舒適為主，最好穿上通風的長袖衫及長褲，可防曬防蚊叮蟲咬。因為要坐地下，女生可避免著裙。
10. 避開鳥巢或蜂巢位置
適合野餐的地點可瀏覽野餐好去處推薦；而野餐的位置也很講究，最好揀平坦、乾淨、空曠、通風的位置，如果選擇樹蔭時，記得避開鳥巢或蜂巢等，咁就全日玩得安心！
👉🏼香港行山好去處專頁：發掘更多人氣/隱世/靚景/新手行山路線！
更多戶外好去處相關文章
