被禁踏入家門 雌雄同體拒為求愛變性：我好自豪做偽娘

【Yahoo 新聞 LGBTQ 系列報道】「我係仔嚟㗎！」╴是偽娘 MC Yip 認識新朋友的開場白。現年 27 歲、天生細粒的 MC，自小喜歡男生，10 年前踏上偽娘之路，過著雌雄同體的人生。至親禁止他踏入家門，伴侶要求他變性成為「真女人」，但他堅拒迎合世俗眼光，忠於自己，「我唔係想做女仔，我好自豪做偽娘」。

MC 的睡房放滿護膚品，衣櫃塞滿女裝衫，陽台掛著剛洗好的男裝內褲，「我每日都用一個鐘準備出門，飲水排水腫、食酵素、敷 mask……」畫上眼線、架上眼鏡，偽娘 MC Yip 正式登場。

扮女售貨員跑業績

MC 身高 155 厘米，骨架纖細，「以前細個會好自卑，男仔喎，得155高.....有個藝人畀人叫153，你都覺得搞笑啦！」小學時期，他發現自己與眾不同，「我知道自己鍾意男仔，嗰時同一個男同學錫完，直頭發現新世界！」MC遂到同志論壇認識同路人，中二首次與男生交往。

為男兒身加添女裝，全因MC於中學畢業後到時裝店當售貨員，「嗰時做零仔（同性戀）都會化下底妝，有個經理見我outlook同講嘢都幾似女仔，話教我點裝扮，因為女仔跑業績會好啲」，開始從挑選香水、化妝技巧著手，再把頭髮留長，但他不太喜歡穿裙和短褲，「短褲最煩，會見到下面（性器官），要用塊衛生巾遮一遮先著」。至於最常被問到的廁所選擇題，他只會到殘廁，「始終咁嘅裝扮入到男廁好尷尬，但我入女廁又真係會冒犯咗人哋」。

「我好鍾意做仔，唔係想做女仔」

異性裝扮者（Cross-dresser）有不同類別，MC屬於少數的「全天候異裝」類型，「其他有啲日頭夜晚身份會轉換，響屋企裝扮滿足吓自己；有啲係for影相，甚至有人性取向會變，男裝嗰陣鍾意女仔，但轉咗偽娘會鍾意男仔」。有人認為與跨性別者（Transgender）相似，但MC沒有性別認知的困惑，「我好鍾意做仔，唔係想做女仔，只係CD係一條啱我嘅路，我諗『酷兒』（Queer）呢個性別比較貼近」。

相較台灣性別多元的氛圍，他形容香港很封建，港人很現實，偽娘扮得靚才叫成功，「難聽啲講，如果我生得醜樣啲，把聲好似男人嘅話，應該會畀人鬧到癲」。

現時MC會接拍硬照，亦會到餐廳兼職。搵工不成問題，最令人沮喪的反而是最親密的家人。MC有次帶男友回家過夜，被弟弟發現，媽媽破口大罵，「叫我唔好喺細佬面前搞啲咁嘅嘢，扭曲佢啲價值觀」。後來MC踏上偽娘之路，遭媽媽評頭品足，更禁止他踏入家門，「拎嘢都要喺樓下等，媽咪拎落嚟畀我......有時會諗你點解唔可以支持吓我？我喺你心中係咪真係咁羞家？」

情路一波三折 堅拒食藥變性

面對流言蜚語，MC總希望身邊有人陪伴，惟在情路上傷痕纍纍。情史豐富的MC指，交往的都是「直男」，「好似我拗攣咗人哋咁！」每一位最終都敵不過外界目光，或重歸女性懷抱而離開，「有時喺屋企沖完涼都係光脫脫咁，初時佢哋都接受到，但之後就完全唔得，直頭連掂都唔想掂到我」。有伴侶要求他服荷爾蒙藥甚至變性，「我驚我會後悔，我最特別嘅地方係我男仔得嚟，外殼係一個女人。如果我變咗一個女人，咁咪就係一個普通嘅女仔？我想搵到一個真正接納到我嘅人」。

「有時都會諗個天點解要咁對我，好似好異類，基得嚟又好乸。如果我性向、行為『正常』啲，我會唔會幸福啲？或者喺家庭上開心啲？」但MC不後悔，「我好自豪，有人會話『男人老狗何必做女人』、『唔男唔女』，但我靚呀，吹呀？」說罷，MC續對著攝記的鏡頭，擺出一貫的自信。獨角獸縱然孤獨，但活得漂亮。

【Yahoo 新聞 LGBTQ 系列報道・逢星期二、四推出】