被網民多次捕獲放上網炫耀 周潤發罕有黑面惹熱議

·3 分鐘文章
發哥黑面?(「大埔為食友」Facebook圖片)
發哥黑面?(「大埔為食友」Facebook圖片)

周潤發(發哥)親民形象深入民心,對粉絲嘅合照要求總係有求必應,合影都唔會托手踭,唔少人更會將與發哥嘅合相放到社交網站晒命,等網友們羨慕一下。近日又有網民張合照放上網,不過今次發哥嘅表情睇落同平時好唔同,發哥竟然激罕黑面,究竟呢位網民做咗啲咩令發哥有咁樣嘅反應呢?

有網民喺「大埔為食友」Facebook專頁出PO,上載與發哥嘅合照並留言話:「今日10點約朋友大埔食嘢,我叫朋友揀食大埔邊間?佢話最深刻我在「林記」見到發哥所以就揀去食點心,點知一坐低竟然又見到發哥,即刻再去捕獵,發哥話:「你又嚟?你成日擺我上網喎!」我回應「係呀!發哥你受歡迎嘛!我每次同你影相都好喜悦同開心!」發哥就拎起電話同我又合照了 #發哥是超Nice並無唔開心及黑人面 #發哥話今次俾D唔同款式既表情給我 #講真每次見到發哥都有緊張同開心 #我平均一星期去二日街市」

呢位網民雖然指發哥冇唔開心同黑面,仲特意擺出唔同款式嘅表情,不過唔少網民就認為佢影太多次兼阻住發哥,留言話:「發哥唔耐煩,次次俾你擺上網,影一次就夠喇,唔好阻住人地食嘢」、「發哥黑面……少見」、「其實有時做藝人 私生活都想自己靜靜地 一畀你哋見到 就即刻又要人影相 你唔煩,人都煩啦」、「影過咁多次,say hi 咪算lor, 其實發哥真黑面都不為過」、「好心啦!映(影)完一次又一次,騷擾人。Respect下人啦!」及「又係為咗呃like而唔理人感受,人善被人欺,發哥真係好慘」等等。另外,呢個PO亦吸引到黃建東及柳俊江,佢哋分別留言「我行咗一世山都仲未撞到發哥…」及「發哥呢個表情,相信唔係演技嚟」。

呢位網民嘅其他網民指責後,急急出PO澄清,留言話:「明明3年嚟都只係5次(計埋昨朝)無端端俾人入多兩次重要被人圍插同攪埋柳爺𠻹!不過食得鹹魚抵得渴,鬼叫我分享咩!人哋都係搵食啫!要話就話我,但請唔好咁惡毒話埋我屋企人!」

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能