豪華餅店獲白武士接管 九龍城48年老舖無得留低 老員工球姐:終須一別

雖有白武士入主接手,豪華餅店屹立九龍城48年的老舖仍無得留低,明年才會選址重開。
雖有白武士入主接手,豪華餅店屹立九龍城48年的老舖仍無得留低,明年才會選址重開。

半世紀老字號豪華餅店早前宣佈結業,雖因白武士接管而有望選址重開,但被公認為九龍城地標的老舖無得留低,9月30日拉閘,告別街坊。店外由朝到晚大排長龍,有客人成功搶購招牌酥皮蛋撻後冒雨站在店外享用,有熟客向老員工球姐送花。豪華餅廚師傅阿富預告將會留任新店,傳承老闆周師傅的傳統手藝。

文字記者:盧珮瑤

攝影記者:HLKP

九龍城豪華餅店原定經營至9月30日結業,結業前夕店舖貼出告示,指豪華餅店老闆周師傅及其家人與連鎖咖啡品牌The Coffee Academics集團達成共識,九龍城店舖原址結業後將會轉手,明年選址重開並易名為「香港豪華餅家1977」。餅店fb專頁亦貼出周太與廖創興後人、The Coffee Academics創辦人廖偉芬合照。

請街坊食奶油蛋糕

豪華餅店告別之日,下午大批市民排隊購買招牌酥皮蛋撻。七彩繽紛花朵餅盒素來是豪華餅店的標誌,餅店近日加推相同設計的鐵罐,讓熟客留念。

餅盒上的七彩花花設計是豪華標誌之一,餅店亦加推相同設計的鐵罐,方便熟客收藏留念。
餅盒上的七彩花花設計是豪華標誌之一,餅店亦加推相同設計的鐵罐,方便熟客收藏留念。
客人搶購一打蛋撻,在店外打卡留念。
客人搶購一打蛋撻,在店外打卡留念。

近傍晚5時半,蛋撻售罄,10多名市民向隅,有正在排隊的街坊大嘆「失望」,並向成功買到最後一盒蛋撻的市民指「你好彩啦!買到最後一盒!」有街坊改為購買南乳花生以示支持。店舖於晚上7時許關門,惟仍有客人未前來領取預訂的奶油蛋糕,老員工球姐決定請街坊吃蛋糕。有熟客前來探望球姐,並送上花束和數張球姐與老闆、餅店合影的舊照,讓她留為紀念。

豪華餅店另一馳名傳統食品為奶油蛋糕,不少熟客日前已特地訂購。
豪華餅店另一馳名傳統食品為奶油蛋糕,不少熟客日前已特地訂購。
餅店於晚上7時許關門前,仍有客人未領取已訂購的奶油蛋糕,球姐決定「賣大包」請街坊吃蛋糕。
餅店於晚上7時許關門前,仍有客人未領取已訂購的奶油蛋糕,球姐決定「賣大包」請街坊吃蛋糕。
有熟客向球姐(右)送上多張她在豪華工作的舊照。
有熟客向球姐(右)送上多張她在豪華工作的舊照。

球姐:真係退休

球姐現年73歲、在豪華任門面近20年,最後一天忙碌依舊,直到蛋撻售罄才有一刻喘息,「有咩唔捨得啫,年紀咁大囉,始終都要捨得,終須一別」。球姐以往日做13小時,工時太長致腰骨勞損。對於會否「過檔」新店,她答:「退休喇,真係退休,掹返直條腰骨」,接下來會稍作休息,退休後會多做運動。

工作近8年的餅廚師傅富哥亦相當瀟灑,「有咩唔捨得啫!唔通喊咩」。他透露將會留任新店,「都係整呢一類,傳統啲嘅延續落去囉,將周師傅啲手藝幫佢延續落去」,但未知何時開始工作。

臨別在即,球姐未感不捨,「始終都要捨得,終須一別」,亦稱將會退休。
臨別在即,球姐未感不捨,「始終都要捨得,終須一別」,亦稱將會退休。

熟客望留住舊時味道:唔使咁多創新

陳先生於結業中領取日前訂購的奶油蛋糕,「奶油蛋糕喺五、六十年代香港好流行嘅味道,所以專登嚟訂返一個畀老人家懷緬」。他小時候每周光顧豪華,雖不反對大集團接手,但要視乎能否保存回憶中的味道,「去到新環境你未必做到返嗰個味道,我反而希望佢唔使咁多創新,做返本身懷舊嘅味道八、九成已經好好」。

楊小姐由沙田到九龍城,初嚐餅店的招牌蛋撻,「因為見到盧覓雪話好食,專登出嚟買!」。她為白武士出現感到高興,「保留吓嘛,香港而家越嚟越少,酒樓已經無乜,而家連餅店都無埋。」不過她同時擔心該店重開後加價,「一定唔會再咁平民化,至少唔會再係10蚊一個」,希望新店主打傳統糕點,「新式嘅嘢而家香港太多喇」。

姚女士則是豪華常客,「我個仔3歲開始食佢啲菠蘿包,日日都要食」,讚賞豪華麵包較有咬口,「唔似出面啲包好似一陣風咁」。但她談及大集團接管時耍手擰頭,稱將來未必再光顧,「你做咗咁多年,接咗手都唔係嗰回事啦」。

豪華餅店拉閘前,大批市民排隊輪候購買新鮮蛋撻。
豪華餅店拉閘前,大批市民排隊輪候購買新鮮蛋撻。
豪華餅店外貼出告示,宣佈九龍城48年原址結業後,店舖將會交由連鎖咖啡品牌The Coffee Academics集團經營。
豪華餅店外貼出告示,宣佈九龍城48年原址結業後,店舖將會交由連鎖咖啡品牌The Coffee Academics集團經營。
店外貼有本地插畫家繪畫的餅店外貌,引來不少客人拍照。
店外貼有本地插畫家繪畫的餅店外貌,引來不少客人拍照。