奶油飄香半世紀 九龍城豪華餅店最後倒數 七旬員工日做 13 小時 熟客排長龍緬懷兒時味道

【Yahoo 新聞報道】半世紀以來，九龍城衙前圍道總被一陣奶油飄香包圍，但這種氣味即將隨風而逝。九龍城地標、開業48年的豪華餅店，由於老闆周氏夫婦年紀老邁，子女無意接手，日前宣佈下月結業，現時只剩兩名員工陪伴豪華走過最後歲月。七旬員工球姐忍著腰痛日做 13 小時，為客人端上香噴噴的新鮮蛋撻。大批熟客在店外築起長長人龍購買懷舊糕餅，用味蕾緬懷兒時回憶。

文字記者：盧珮瑤

攝影記者：HLKP

自豪華餅店結業消息傳出，店外每天早上7時的人龍越築越長。記者昨天所見，平日早上9時許門外仍有約30人排隊，向老店最後道別。「呢幾日賣咗（蛋撻）差唔多50底（約1500個）！」，在門面「一腳踢」、73歲的球姐忙得不可開交，除了應付客人，還要捧出新鮮出爐蛋撻、逐一脫模並裝盒，每個步驟速度與精準兼備，是她20年來的訓練所成。

蛋撻只用本地蛋 包點沿用奶油忌廉

豪華餅店以老派造法聞名，市面鮮有的花卷、雀巢蛋糕等港式懷舊糕餅都是鎮店王牌，招牌酥皮蛋撻高峰期更每天賣3,000個。餅店「事頭」周先生原為餅廚，以往堅持親力親為，人手製作每個糕點和麵包。然而老闆夫婦年長兼抱恙，店中只剩兩位員工，即球姐與一名餅廚師傅。

球姐指，老闆至今仍堅持用本地蛋製作蛋撻，「本地蛋先最穩陣，因為唔會溝其他嘢，如果用外國嘢都唔知入面溝咗啲咩，有防腐劑嗰啲，如果唔係點擺得咁耐呀！」用本地蛋造出的蛋撻也更企身，「每個年代都係蛋撻最好賣」。師傅會以鐵質蛋撻模焗成蛋撻，球姐則會整盤捧到門面，隨即冒熱徒手脫模，將新鮮滾熱辣的蛋撻入盒。她曾因而燙傷手指但堅持徒手，只因分秒必爭，「出面如果係用手套做嘅，一定唔係最新鮮」。

麵包方面，豪華的包點款式雖不及坊間亮麗，但球姐形容勝在飽肚。該店沿用廣東式製法，以奶油忌廉取代坊間常用較輕身的鮮忌廉，較硬身、有咬口，更飽肚。

發哥每周光顧「樣樣都鍾意食」

藝人周潤發為九龍城常客，豪華亦是其「蒲點」。球姐笑稱，發哥每周光顧一次，「佢樣樣都鍾意食！發哥好好人㗎」，又指他曾充當店長幫忙賣餅，「整個蛋撻嗰陣都試過焫親！」

球姐加入豪華前，已是九龍城的老街坊，一直在區內飲食業打拼，「以前做金豪（茶餐廳）一做就10幾年，嗰陣望住商場起」。球姐的家鄰近豪華座落的衙前圍道，「嚟到呢度做，又一做就十幾廿年」。對工作一心一意，亦是一種老派情懷。

舊居重建 老店結業 街坊情深

談起老闆，球姐又愛又恨，「『事頭婆』就無乜嘢，但『事頭』好麻煩，乜嘢都要管，但而家隻腳唔係好行得喇，都無得麻煩喇！」周老闆卻似乎很疼愛這位老員工。球姐記得，試過在他面前放下鑰匙：「你唔鍾意我，我唔做喇」。老闆聽罷著急：「我鍾意你呀！你要留低呀！」這樣拉拉扯扯，轉眼就20載。令她留下來的，還有一班街坊，「過時過節啲客會送好特別嘅禮物畀我，之前先有月餅，早幾日仲有封300蚊利是！」萬物有盡時，球姐日做13小時令腰骨勞損，決定休養生息，「你阿媽70幾歲，你仲會唔會叫佢做嘢吖？」

早於三年前，球姐因家住的大廈要重建而遷居，工作的餅店亦即將結業，九龍城似乎離她越來越遠，「無話鍾意邊度嘅，呢邊就住慣住熟，真係倒後行我都識行」。九龍城面臨重建，她卻不怕面目全非，「我哋唔係啲咁古舊嘅人嚟嘅，重建無乜所謂，舊嘅唔去，新嘅又點嚟呢？」。

「有啲味道唔會喺新式舖頭食到」

在九龍城區居住近30年的伍小姐特意前來光顧，「其實我最想買花卷，但而家得返蛋撻，失望！」她指小時候鮮有機會吃蛋糕，每次都非常珍惜，花卷成為兒時重要回憶，「一個卷入面有朱古力、雲呢拿，細個係貪呢啲味，而家出面無乜地方有得賣」。她亦鍾愛豪華的麵包硬身、飽肚，「而家新嘅麵包多數工場出，食完好似無食過咁」。對於豪華離開，她難免感到可惜，「有啲味道唔會喺新式舖頭食得返」。

容先生亦是豪華「忠粉」，10多年來每到九龍城區定必光顧，昨特地由荃灣前來買蛋撻。容指豪華出品是回憶的味道，「係食返細個嘅嗰種味道，所以一定可惜，老舖都越執越多，不如搵發哥頂咗佢嚟做啦！」至於九龍城重建，他大嘆無可奈何，「都係時代嘅進步，不過希望可以keep（保留）到啲老店，balance（平衡）到就最好」。