回收卡板製環保木貓砂 貓奴創唯一香港製造品牌

「六斗」項目總監佘鑫豐(Kelvin)原是建築及室內設計師,於2019年創立本地木貓砂品牌「六斗」。
「六斗」項目總監佘鑫豐(Kelvin)原是建築及室內設計師,於2019年創立本地木貓砂品牌「六斗」。

【Yahoo 新聞報道】市面貓砂大多屬外地貨,有香港公司利用回收卡板製成貓砂,創立目前唯一香港製造的木貓砂品牌「六斗」。本身是貓奴的負責人指出,為貓咪健康著想,製造過程無添加化學物,加上木貓砂較豆腐貓砂粗身,吸水能力強之餘,也可減少更換次數。一包貓砂可使用達一個月,變相更耐用。

文字記者:盧珮瑤

攝影記者:H.H

「希望做啲嘢幫到香港」

「六斗」項目總監佘鑫豐(Kelvin)是建築及室內設計師出身,「嗰時學到好多環保概念,希望喺設計入面做到環保,但發覺都係天方夜譚」。他在澳洲工作卻有志難伸,「起樓牽涉好多成本,啲客覺得平、靚咪得,做乜咁複雜,發覺其實咁樣幫唔到個大環境」。2016年香港唯一回收木材卡板的公司因缺乏政府支援結業,卻激發Kelvin逆流而上,「點解無人做呢?唔想啲卡板浪費咗,希望做啲嘢幫到香港」。

翌年他回港擲千萬元,於上水文錦渡設置2萬平方呎廠房,最初以回收卡板再造木煤產品為目標。木煤源自木材廢品和森林殘留物,用來產生電力和熱力,「我哋非常睇好,日本、韓國好多地方都用緊,希望香港都有機會用到」。不過,Kelvin發現香港回收木材數量有限,遂思考其他木製品的可能性,靈感由愛貓而來。

Kelvin於2017年先設立「綠盈環保有限公司」,並擲千萬於上水文錦渡設置2萬呎廠房,隨後轉型出產貓砂。
Kelvin於2017年先設立「綠盈環保有限公司」,並擲千萬於上水文錦渡設置2萬呎廠房,隨後轉型出產貓砂。

自己貓砂自己整

「我隻貓喺澳洲跟我返嚟,返到嚟用極啲貓砂都唔係好鍾意」,市面貓砂款式林林總總,包括豆腐貓砂、紙貓砂、木貓砂、水晶或礦物貓砂等。Kelvin原本多用紙貓砂,但因一次缺貨轉用豆腐貓砂,發現愛貓未能適應,「豆腐貓砂好輕,佢會爬到周圍都係」,索性「自己貓砂自己整」,「知道市場有啲木貓砂,自己都係做木相關,想研究下點樣做」。

現時香港木貓砂品牌不足10個,當中大多屬外地進口貨。Kelvin於2019年創立本地木貓砂品牌「六斗」,由回收過程、生產、包裝均是香港製造,成為香港唯一一個「本地薑」的木貓砂品牌。Kelvin目前主要由可口可樂、卡樂B等食品廠回收卡板,其次是物流公司、倉務貿易公司等。卡板先放進破碎機,打成一條條約5至10厘米的木屑,再以粉碎機打成木粉並烘乾,「香港濕度高,貓砂前提係一定要乾身」。Kelvin強調,整個過程會四度除鐵、三度除塵,「啲塵會痴住我哋個肺唔健康」。

回收卡板後會先以破碎機將整塊卡板壓碎。
回收卡板後會先以破碎機將整塊卡板壓碎。
壓碎卡板後,再以粉碎機將木屑打成木粉,並加以烘乾。
壓碎卡板後,再以粉碎機將木屑打成木粉,並加以烘乾。
烘乾木粉後,高溫壓縮消毒機器會將木粉壓至木貓砂形狀。
烘乾木粉後,高溫壓縮消毒機器會將木粉壓至木貓砂形狀。
Kelvin指,整個回收過程會有四度除鐵、三度除塵,確保當中沒有損害健康的雜質。
Kelvin指,整個回收過程會有四度除鐵、三度除塵,確保當中沒有損害健康的雜質。

木粉烘乾後,高溫壓縮消毒機器會將木粉壓至木貓砂形狀,「個機產生嘅溫度係170℃甚至200℃,壓得幾實就有幾吸水」。市面一般貓砂或會加入石膏粉、凝結劑等,以讓貓砂結團方便清理。但Kelvin在製造過程謝絕任何添加劑,「有啲品牌我一打開都聞到好大陣chemical(化學物品)味,人聞都覺得刺鼻,更何況貓要日日聞?」為了貓咪健康,Kelvin亦只會收實木卡板,「蔗渣木太多膠碎喺中間,無晒木纖維同唔健康」。「六斗」同時出產馬砂,供澳門賽馬會使用;部份木糠亦會供予城大牛場。

高溫壓縮消毒機器會以近200℃高溫將木粉壓成條狀貓砂。
高溫壓縮消毒機器會以近200℃高溫將木粉壓成條狀貓砂。
Kelvin指,蔗渣木內含過多膠碎難以回收,現時只會回收實木卡板。
Kelvin指,蔗渣木內含過多膠碎難以回收,現時只會回收實木卡板。

一包木貓砂可用一個月

「六斗」木貓砂每顆粗約8毫米。Kelvin指,由於豆腐貓砂較輕,或會令貓咪如廁後黏在身上,影響家居衛生,較粗身的木貓砂可改善類似問題;Kelvin建議主人可用雙層貓砂盤,只需更換弄髒的木碎,相對其他貓砂整盤更換更耐用,「豆腐砂一個禮拜換一次,咪會去得快,木嘅話一包、一隻貓可以用一個月」。他亦正研究推出6毫米的木貓砂,「聽過有啲幼貓唔習慣用咁粗,既然做得香港品牌,梗係做返香港人想要嘅嘢先」。

「六斗」貓砂粗約8毫米,Kelvin正研究製作較幼身的木貓砂,方便幼貓使用。
「六斗」貓砂粗約8毫米,Kelvin正研究製作較幼身的木貓砂,方便幼貓使用。
圖左為全新的木貓砂,圖右則為吸水後的木貓砂,貓奴只需將用過的木碎倒在廁所清理便可。
圖左為全新的木貓砂,圖右則為吸水後的木貓砂,貓奴只需將用過的木碎倒在廁所清理便可。

目前「六斗」每月出產近2,000包木貓砂,但Kelvin坦言木貓砂用家在香港仍屬小眾,「豆腐貓砂佔咗七成,其餘三成係其他貓砂去瓜分」。他認為與潮流和認知有關,「行過寵物店你見到啲貓砂盤都係用緊豆腐砂,要潛移默化等多啲人認識」。未來他冀加強推廣,如贊助動物義工試用,寵物友善的香港瑰麗酒店(Rosewood)亦正採用「六斗」木貓砂,「希望用新方式打開新窗口,亦都支持返香港環保」。

【「六斗」facebook】

https://www.facebook.com/GreenPawsHongKong

「六斗」在HKTV Mall和部份竉物店有售,每包68元,Kelvin指一包可供每隻貓使用1個月。
「六斗」在HKTV Mall和部份竉物店有售,每包68元,Kelvin指一包可供每隻貓使用1個月。