5大越南Pho推介!灣仔米芝蓮推介名店、旺角區人氣牛柳牛丸粉

講到pho絕對係最代表越南菜嘅其中一種菜式,湯底主要用牛骨熬製而成,配上河粉、牛肉或雞絲,並佐以生芽菜、香葉、青檸及辣椒一同食用。今次介紹五間喺香港人氣嘅越南pho餐廳畀大家,有連續五年獲得米芝蓮推介嘅名店、旺角區人氣牛柳牛丸粉、和牛湯底、創意越南菜館及越南人主理小店,各有特色。

香濃牛湯油湯底 Brass Spoon

連續五年獲得米芝蓮推介、位於灣仔月街嘅名店,必試當然係最多人食嘅特級生牛肉河粉,湯底用上過百斤牛骨熬製12小時而成,湯頭極之濃郁,同時做到清澈鮮甜,無添加味精,飲晒成碗都唔會口渴。最特別係湯底加咗一層薄薄嘅牛湯油,令湯底牛香味更重,但唔會油。牛肉一碗大約有5-6片,肉質都好嫩滑,呢碗pho絕對令餐廳抵得上米芝蓮呢個稱號。

圖: ctyfoodiary
圖: ctyfoodiary

旺角超人氣牛柳牛丸粉 越發地道河內料理

被稱為油尖旺區最好食嘅pho,店舖細細,長期都有條人龍喺門口,到底有咩吸引之處?招牌牛柳牛丸粉,湯底鮮味濃郁,配上炸両、青檸同辣椒,建議將炸兩浸一浸湯先食,會吸收晒湯底嘅香氣。至於配料牛柳同牛丸都係主角,前者有牛味同咬口,都好juicy,同平時坊間食開嘅牛肉片好唔同,牛丸亦非常爽口彈牙。

圖: foodiehkboy
圖: foodiehkboy

和牛藥材足料湯底 Spring field 

講到矜貴一定非呢間主打越式牛肉河嘅餐廳莫屬,招牌春園河嘅湯底係用和牛、牛骨、蔬菜,同草果、丁香、八角等藥材每日以慢火熬煮16個小時而成。配料就有安格斯牛肉、慢煮牛𦟌條同蘿蔔,安格斯板腱牛肉片口感嫩滑,牛𦟌條先用和牛湯慢煮再切條煨煮,好入味而且肉味香濃。蘿蔔粒同樣出色,清甜軟腍帶牛湯底香氣~

圖: littlefoodie00
圖: littlefoodie00

創意越南菜館 pho.dle.bar

主打創新嘅越南菜館,佢哋嘅pho湯底以多種香料熬製6小時以上而成,味道香濃,配料推介美國安格斯生牛肋片,油脂均勻,半熟粉嫩,肉香都好突出!另外仲有牛腱、美國生牛肉同雞絲扎肉等選擇。幼河粉好滑,掛湯度十足,一入口係滿滿牛香。

圖: keithkkku
圖: keithkkku

南越特色煮法 Xi Xup

大圍特色越南小店,招牌生牛牛丸牛腩河粉,餐廳採用南越煮法,湯底會落椰糖調味,味道清甜,飲晒都唔會覺得太鹹。牛肉片嫩滑,牛丸都好重牛味同彈牙。如果鍾意牛香嘅,特別推薦大家加招牌牛骨髓,牛脂味好香濃,口感有啲似肥膏,但唔鍾意肥膏嘅朋友就未必啱啦~

圖: RheaChim
圖: RheaChim

文: Yanica

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能