辣招都無符 3個買樓發達的視后

近排蔡少芬晉升明星樓后，身家據聞仲已經有1億添。其實唔少明星賺埋賺埋，都選擇投資喺買樓到，香港樓市年年都升，一班明星身家都暴漲唔少。而一班新晉樓后之中，唔少都係TVB視后嚟架：

蔡少芬（Ada）

作為1998年嘅視后，Ada演技一早被肯定，亦都穩佔TVB一線花旦席位。2008年嫁畀內地武指張晉，一直被指「女尊男卑」，直至張晉2014年憑電影《一代宗師》「馬三」一角獲得香港電影金像獎最佳男配角，先再唔畀人定型。不過你有你講，Ada一於懶理，反而一直默默投資，為一家四口打算。Ada呢幾年主力返內地賺人仔，出演劇集《後宮甄嬛傳》同綜藝節目《偶像來了》令佢人氣急升，故自2011年先後買入元朗錦綉花園、柯士甸道西凱旋門、灣仔囍滙、元朗爾巒，連埋喺北京四環同張晉家鄉多個單位，粗略估計Ada手持起碼9個合共市值近一億港元嘅物業。Ada唔單止人靚做戲叻，投資持家仲非常有道呢！

佘詩曼

兩屆雙料視后佘詩曼，係香港係TVB一姐，返大陸拍大製作依然擔正做女主角，收視仲一定有保證添～近年除咗拍劇，阿佘仲拍埋電影，平時仲不時上內地綜藝節目，密密搵真銀。賺埋咁多，阿佘就鍾意買樓投資保值。阿佘其實自從升咗做一線花旦，就開始買磚頭，好似03年用500萬買入嘅北角千呎風水屋，早年就以1,368萬賣出，賺咗成倍。而阿佘自2011年返大陸之後，仲年年勁大手筆賺入多個千萬單位，上年仲一口氣用咗3,500萬買咗南山兩幢相連嘅獨立屋。阿佘依家擁有嘅5間豪宅，總市值約有1億1746萬，「樓后」之名當之無愧～

胡杏兒

2011年終於一嘗視后滋味嘅胡杏兒，公開多謝當時男友黃宗澤：「我知自己好難頂，你都好難頂，希望我哋一齊頂住大家」，點知之後頂多唔夠一年就散咗。但榮升視后嘅杏兒有價有市，2013年連續掃咗2個單位，當時4個物業夾埋市價都值約3,700萬啦。之後2015年胡杏兒又同知名設計師姚子裕合作投資7位數嘅婚紗店，睇嚟胡杏兒宜家物業市價都值超過半億啦～而且宜家同老公Phillip又咁恩愛，簡直愛情事業兩得意。

圖片來源：蔡少芬＠微博、佘詩曼＠微博、胡杏兒＠微博