逃不過發福命運 昔日「少女殺手」陳鍵鋒變發脹大叔

昔日無綫嘅「奧運六子」各有發展，陳鍵鋒（Samuel）當年以清秀靚仔、身材高大風靡萬千少女嘅心，更被封為「少女殺手」，不過近日佢出席內地電影《玄探包拯》開機活動時，被網民發現佢身型及面形明顯發脹咗唔少。

過往都有唔少經典角色，例如《律政新人王》Vincent、《學警雄心》李柏翹及《少年四大名捕》追命，另外仲有《王老虎搶親》中反串做女人，仲讚佢靚過唔少真女人，令人留下深刻印象。不過之後工作量一直減少，陳鍵鋒選擇約滿離開無綫，轉戰內地市場。憑俊俏嘅外表加上不俗嘅演技，陳鍵鋒喺內地得到唔少演出機會，仲差唔多套套都係做男一，當中《美人心計》、《亂世佳人》及《封神英雄榜》令佢人氣急升，吸引咗唔少內地女粉絲。

一直keep得唔錯嘅佢，就算上年年頭拍攝港台劇集《火速救兵》及出席活動時狀態依然。但去到10月，佢同馬國明、林峯同埋吳卓羲齊齊出席監製潘嘉德榮休加70歲壽宴，合照時一睇已經係比較發福嘅一位。

喺12月，佢出席內地懸疑玄幻電影《玄探包拯》開鏡儀式嘅時候，無論係面形定係身型都明顯發脹唔少，唔少網民都議論紛紛，仲話佢由奶油小生變大叔。