【遊車河】駕入科學園 踩車食玩Hea

上星期先啱啱放完四日復活節假，都叫玩夠食夠。今個星期有啲懶散，想休息下唔想咁瀕撲，除咗恆常嘅搵套戲睇搵餐飯食以外，想搵個靜靜地嘅地方，乜都唔好理hea過周末，俾思想沉澱一個下晝，有冇啲靜態啲又泊到車嘅去處？

科學園有電動車叉電設施，所以好多Tesla車主都好鍾意嚟呢度。

講hea，大埔科學園（或者叫「科技園」）其實係幾好嘅地方。首先，揸車去唔愁冇位泊，因為有3個停車場，1,500個車位，平日返工日子都唔full，假日啲office休息仲更加鬆動。揸車去科學園其實好容易，如果由東九龍經大老山隧道入去，朝住馬料水方向行，過橋橫越沙田海之後靠晒左，入迴旋處揀第三個出口，再直行就係科學園。如果由獅隧入仲容易，出隧道後向大埔方向行，又係見到馬料水路牌就靠晒左，一樣可以去到同一個迴旋處。如果由北區過嚟，就行新界環迴公路同吐露港公路，過晒大埔之後見馬料水/科學園路牌就靠左上橋，又係去同一個迴旋處。

停車場大把位，唔駛驚無位泊車。

如果你鍾意踩單車，大可泊低架「四個轆」喺停車場，然後捧你架心愛嘅「兩個轆」戰車上單車徑踩十幾公里，因為呢條單車徑一邊可以踩去到大圍、沙田、馬鞍山，另一邊就通往大埔市中心、汀角路、大尾督，可以講係新界東單車徑嘅中間位。最重要係有位泊車，你試下調翻轉去大圍或者沙田起步，想搵個位泊好架四個轆都幾難。

白石角長廊單車徑嘅位置，正好係新界東單車徑嘅中心點。

除咗踩長途入科學園，亦有好多人專登揸車運架單車嚟踩。

四個轆車位固之然多，海濱單車位亦足夠。

如果我唔踩單車，咁遠水路過到嚟，仲有咩搞先？就係貪佢乜都冇夠晒靜局！科學園呢段位置，其實就係白石角海濱長廊一部分，附近風景相當正，遠眺對面岸嘅馬鞍山，即使只係坐喺度吹下海風都幾好feel，仲會見到吐露港海面有魚群跳出水面。水池旁邊同海旁一帶有好幾間食肆，有擺設戶外枱，亦有間中型起市同石級，周末晏晝揸車入嚟叫杯嘢飲坐下，對住個海同朋友吹下水，感覺都幾平靜；或者帶本書嚟邊坐邊睇，睇到悶起身沿住海邊散下步，絕對有助刺激思維。金蛋後面種咗幾棵日本山櫻，呢排正值花期，唔得閒去日本？咪過嚟呢度賞下櫻花頂住癮先囉。

據聞呢度都幾多魚，不過要小心。

嗱冇呃你真係隨時見到啲魚跳出水面。

講開個海，呢區水域地理上位於城門河口、沙田海同吐露港一帶，據聞魚量都幾多，因此科學園係釣魚勝地，唔少釣友都會專誠嚟呢度都碰下運氣，尤其係黃昏至夜水，聽講都幾多大魚，立魚、紅鮋甚至石斑都有，當造季節條條都斤幾重。好多人會爬出去石磯垂釣，呢個行為就真係要三思，因為曾經發生過意外，釣魚啫，唔駛搵命搏嘅，萬事小心為上。

除咗海濱，大水池旁邊都有露天餐廳。

其實科學園本身都成日搞節目，例如各大汽車品牌，都好鍾意喺「金蛋」對出嘅位置搞車展，由於地點鄰近吐路港高速公路，所以都係試車活動嘅熱門場地，最常見嘅就係電動車同環保車展，因為同科學園嘅高科技形象好匹配。而呢度亦有六個Tesla電動車專用嘅快速叉電器，所以揸呢款車嘅車主成日都嚟呢度，食個早餐或者下午茶等叉電。早排仲舉行過太陽能電動車比賽，將部分車路改成臨時「賽道」，如果撞啱有呢類活動舉行，作為車迷都千祈唔好錯過。呢個星期六（4月2日）又有運動品牌喺度搞長跑活動，所以科學園嘅活動排程都幾密，即使係普通日子嘅夜晚，都係好多車會單車友同跑友聚會嘅地方。

科學園成日搞event，今個星期六就有跑步活動。

金蛋後面有好幾棵日本山櫻，而家正值花期。

講到食，除咗頭先講嘅戶外酒吧連西餐廳，同埋連鎖式食店之外，科學園仲有兩間中式茶樓，試過星期日上午專登揸車入去同朋友飲茶，發現原來都幾易搵位。雖然搭車入科學園唔算方便，但對駕駛者嚟講泊車設施都幾足夠，加上飲茶食飯有泊車優惠，消費滿$200有2個鐘，$400就有4個鐘，周末仲有特別收費優惠，對駕駛者嚟講係一個hea過周末嘅好地方。