邊幾位最適合做港版《屍殺列車》 ？

韓國喪屍電影《屍殺列車》喺亞洲地區大受好評，劇情緊湊，將人性的善惡完全刻劃出來，高水準！電影喺香港、台灣都引起一股熱潮，所以，如果香港要翻拍《屍殺列車》，梗係要搵返一眾好戲之人飾演入面嘅角色啦。戲入面三大重要角色：男主角、大隻佬同奸角，搵以吓呢3個人做應該都幾適合，（以下含劇透，慎入！）

男主角－張家輝（打得又本身有個囡囡）

電影《屍殺列車》男主角孔劉飾演一名爸爸，因為想帶個女去釜山搵前妻一齊慶祝囡囡生日，不幸上咗架有喪屍嘅列車，為咗保護個囡，男主角於是就開始勇猛地同喪屍戰鬥。由開頭男主角只顧自己同個女，到後來開始會關心別人嘅心路歷程轉變，當然需要到一定演技，搵影帝張家輝做男主角實OK啦。除咗因為有演技啦，張家輝本身都有個10歲大嘅女，當戲中小演員差唔多大，應該更加能體會保護年紀尚小嘅愛女心情。而且，講明係喪屍片，打打殺殺場面少不了，張家輝都已經拍過唔少啦，好像之前就為電影《激戰》操到一身肌肉，唔畀孔劉輸蝕。相信佢拍《屍殺列車》埋身肉搏嘅動作場面應該有唔錯嘅效果。

大隻佬－洪金寶（外表兇狠內裡溫柔）

電影另一個看點當然係大隻佬馬東錫啦，雖然個樣好似好惡咁，為咗保護大咗肚嘅老婆，Man到成個葉問上身咁，一個打十個。最記得就係佢帶頭走去喪屍，呢一吓，真係真漢子。最搞笑就係佢雖然孔武有力成日爆seed打爆啲喪屍，但面對老婆鄭有美就小男人上身，任得老婆對佢呼呼喝喝，鐵漢柔情咪呢啲。講到同馬東錫體型同身手相似嘅香港演員，小編就即刻諗起洪金寶，洪金寶作為七小福中嘅大師兄，18歲就開始做龍虎武師，身手當然了得，就算宜家發福咗唔少都一樣打得。而洪金寶雖然宜家個樣非常霸氣，但對住自己個孫就一臉溫柔，對自己老婆高麗虹就更加不得了，話兩公婆嘈交一定自己道歉先，又話老婆係自己嘅所有。鐵漢柔情到咁，呢個角色搵愛妻成魔嘅佢做就最適合啦！

奸角－廖啟智（奸得有味道）

電影入面嘅大奸角金義聖由頭賤到尾，為咗自己生存，不斷推其他人去死，總之就係個個都一路睇一路嬲「點解咁多人死唔見你死」。不過雖然佢自私自利嘅行為真係令人睇到咬牙切齒，但如果換轉係你又會點做呢？其實如果只係單純將一個角色分好同壞係唔夠，因為咁樣嘅角色並唔立體，雖然套戲有交代點解佢咁做，不過好似唔太改變到觀眾睇法。所以如果港版翻拍的話，搵廖啟智（智叔）做應該幾適合。智叔作為老戲骨，亦正亦邪嘅角色對佢無難度啦，好似之前電視劇《選戰》宋漫山一角咁。而且由智叔嚟做，觀眾會不斷諗到底點解智叔要咁做，為咗自保而犧牲他人，背後應該有佢嘅理由，就可以令觀眾明白到其實係咁嘅環境，無人係絕對善或絕對惡。

圖片來源：電影《屍殺列車》、電影《魔警》、電影《葉問2》、電視劇《選戰》