那些年，5個已變為人父的小鮮肉

周渝民（仔仔）近日升格成為爸爸，其妻喻虹淵順利誕下小公主，可喜可賀～不過估唔到當年迷死人嘅小鮮肉仔仔，眨下眼就變成散發成熟男人味嘅爸爸，時間真係過得好快，嗚⋯⋯

等我哋一齊睇吓5個已變人父的那些年小鮮肉：

周渝民

提起仔仔，一定會諗起當年佢喺《流星花園》飾演嘅「花澤類」，可以話係第一代溫柔體貼又靚仔嘅暖男角色，迷死唔少少女。如果要小編喺F4入面揀一個，識揀一定係揀仔仔啦！仔仔亦因為呢個角色爆紅，成為當時灸手可熱嘅小鮮肉，拍唔少青春偶像劇，不過亦因為咁經常被認為係偶像派。後來仔仔開始嘗試轉型，憑2009年拍《痞子英雄》飾演放浪不羈嘅痞子得到金鐘獎提名，2013年憑《回家》奪得金鐘獎戲劇節目男主角獎，成功轉型為演技實力派。而仔仔亦因《痞子英雄》而與妻子喻虹淵結識，拍拖四年結婚後，於近日誕下愛女，昔日花美男都變成魅力熟男人父啦～

林志穎

林志穎17歲就出道，當時青靚白淨，笑起嚟又有酒窩，好似個陽光大男孩咁。所以一出道就大受歡迎，得到「台灣四小天王」名號，甚至紅到嚟香港，成為紅館開演唱會最年輕歌手（當時18歲）。而佢唔單止喺演藝事業得到亮眼成績，作為賽車手嘅佢，係台灣第一個參加國際頂級賽事嘅車手。2009年35歲嘅林志穎宣布成為人夫，並於2010年與台灣Model陳若儀結婚。之後林志穎仲同兒子Kimi上咗國內真人Show《爸爸去哪兒》，獲得極高人氣。雖然林志頓已經做咗人爸爸，不過有「凍齡男神」之稱嘅佢，童顏樣子仲可以稱得上係小鮮肉呢～

吳尊

作為前台灣人偶像團體「飛輪海」成員嘅吳尊，一出道，佢俊俏嘅外型立即吸引唔少Fans。其後拍多套台灣偶像劇，包括《東方茱麗葉》、《花樣少年少女》、《公主小妹》、《籃球火》等，劇從面外冷內暖嘅形象更加令佢人氣急升，成為新一年小鮮肉。而且，吳尊家世顯赫，家族喺汶萊在錢有地位，高富帥嘅佢成為不少人眼中嘅男神。不過2011年宣布退團，並於2013年公開承認09年已經結婚。吳尊育有一子一女，2014年仲帶埋囡囡上國內真人show《爸爸回來了》。不過其實36歲嘅佢依家都係咁靚仔，拍得住今時今日啲小鮮肉。

吳彥祖

1998年一套《美少年之戀》，當時非常嫩口又靚仔嘅吳彥祖，立即成為最人氣嘅小鮮肉。《新紮師妹》做黑幫大佬兒子，但係就對方麗娟一往情深，成為唔少人心中嘅白馬王子。不過太靚仔都有唔好處，就係會被人當做花瓶。不過隨著吳彥祖漸漸變得成熟，又接拍多套劇情、動作片，包括《旺角黑夜》、《三岔口》、《門徒》、《新宿事件》、《竊聽風雲》系列、《魔警》等，漸漸擺脫花瓶之名。而吳彥祖2010年同女友model Lisa S.結婚，三年後誕下愛女，出哂名好老公好爸爸。雖然佢唔再係小鮮肉，但佢成熟男人嘅魅力，已經令佢升格做男神啦～

謝霆鋒

作為謝賢同狄波拉個仔，自從就喺傳媒嘅閃光燈下長大。16歲嘅謝霆鋒以叛逆嘅形象出道，經常作MK打扮，又會「掟咪」同「掟結他」。雖然憤青行徑引起不少抨擊，但係佢靚仔，加上叛逆作風好似好型，所以有唔少青年人當時都好鍾意佢，成為當紅小鮮肉，不過之後因為頂包案而人氣下滑。其後與張栢芝結婚，先後誕下兩子，並一改形象成好丈夫、好爸爸，亦專注向電影方面發展，憑電影《綫人》奪得金像獎最佳男主角。雖然後來同張栢芝離婚、與王菲復合令佢好男人形象受損。不過謝霆鋒多次唔錫身搏盡拍戲，又做埋影像後期製作公司老闆，己經由當年青澀嘅小鮮肉變成娛樂圈中筍盤。

圖片來源：電視劇《流星花園》、電視劇《痞子英雄》劇照、林志穎微博、電視劇《公主小妹》、吳尊微博、電影《美少年之戀》、吳彥祖微博、謝霆鋒《壞習慣》MV、謝霆鋒Facebook